JJM-ni kamrango tangka paisa jakkalsretani dongja ine PHE Minister a·kanga

SHILLONG: Meghalaya a·doko, mongsongbate Garo Hills-ni bang·a biaprangon Jal Jeevan Mission (JJM)-ni kamrangko ka·anio matchotgija tangka paisarangko oke ra·a ine matnanganirangko nikna man·engoba, a·doko JJM-ni kamrangko ka·anio tangka paisa jakkalsretanirang dongja ine a·dokni PHE Minister Marcuise N Marak a·kangatskaaha.
Rajabala MLA Mizanur Rahman Kazi-ni matnanganirangna aganchakaniko on·angengon, ia pilakan manderangni ma·sisretanirangsan ong·aia aro da·o dipet ia kamrang matchotsranga ong·kujaenga indiba ka·enggipa kamrangsan ong·kuenga ine Marak parakataha.
“Tangka paisa jakkalsreta ine matnanganirangde donga indiba JJM-ni kamde, kamrang matchotani ja·man gittamgipa party-sa kamrangko nipilanggen aro tangka paisarangko gamchina recommend ka·gen. Uni ja·mansa sorkari, contractor-rangna tangka paisarangko gamna man·a. Uni gimin iano tangka paisarangko jakkalsretani cholrang dongja,” ine PHE Minister talataniko on·angaha.
Indake ong·genchimoba, chiring chibisikrang tipangengahani a·sel JJM-ni kamrangko chu·sokatanio neng·nikanirangko chagrongna nangenga ine Marak parakatskaaha.
“Je chibisikrangkon kenchakna nangbatgipa ine segatahachim, uandakgipa chibisikrangan da·o tipangengahani gimin JJM-ni kamrangko chu·sokatanio chinga neng·nikanirangko chagrongna nangenga. Indiba ia neng·nikanirangko sorkari chel·atna jotton ka·enga,” ine Marak aganaha.
PHE department-ni chagrongna nangenggipa neng·nikanirangko janapangkuengon, “Jensalo treatment plant-rangko saniba a·ao donna nangon, a·a nokgiparang baksa agangrikchengna nanga indiba a·a nokgiparang on·na sikjaon, kamrang ja·manchakatako man·rongaia. Uni gimin a·a nokgiparangko didina gita somoiko nanga. Uni ja·man buring bolgrimrangoba neng·nikanirangko chagrongna nanga aro chinga forest department-oniko NOC-ko ra·na nangronga. Ianoba chinga neng·nikanirangko chagrongna nangenga maina forest NOC-ko ra·na dingtang dingtang niamrang donga. Iandakgipa neng·nikanirangko chagrongna nangengani a·selsa mitam kamrang ja·manchakatako man·enga, una agrede pilak kamrangan somoi gita matchotrongaiachim,” ine PHE Minister aganaha.
JJM-ni kamko 2028 bilsini gisepo matchotchina gita a·dokna somoiko on·aha ine janapatskaengon, ia donsogimin somoina skangan kamrangko matchotatna krenggen ine PHE Minister, ku·rachakaniko on·angaha.