SHILLONG: Meghalaya a·doko niam gri koela bikotaniko National Green Tribunal (NGT) champengatahaoba, da·onan a·dokni dingtang dingtang biaprango niam gri koela bikotaniko nikna man·kuenga aro Enforcement Directorate (ED)-ni gita dingtang dingtang biaprangoniko am·sandion, salprako ton 1200-mangni gita koelarangko bikotengkua ine nikna man·aha.
Ia am·sandianirangko ED, re·anggipa Bristibar salo, South Garo Hills a·jani Jadigittim aro Nongalbibra, Bongaigaon-ni Jogighopa, Tinsukia-ni Margherita aro Guwahati koela a·damrangoniko dakangaha.
ED-oni koborko on·ani gitade, South Garo Hills a·jani Jadigittim jolrango skango jakkalgipa turirangchi, niam gri koelarangko bikotengkua aro koela bikotanio, manager-rang, sardar-rang aro labour-rangba jak donga.
Era Aning aro Goreng jolrango niam gri dam 20 koela a·kolrangko chalaienga ineba ED official-rang parakataha.
“Batanggimin bilsi 10-na a·doko niam gri koela bikotaniko champengatahaoba da·alonan maming naljokani gri aro samtangtango ong·telaigiparangna nangchakeani gnang koelarangko niam gri bikotengkua,” ine ED parakataha.
ED-ni am·sandianio, niam gri koela bikotanina rim·a man·gipa manderangko joltangni police-rangna pakwate on·angaha.
Ia kamo, Meghalaya aro Assam a·dokni manderang donggipa dol jak donga ine janapatengon, ia manderang, Meghalaya a·doko niam gri bikotgipa koelarangko sima jol gita Assam-ona salangenga ine ED parakataha.
Ia koelarangko niamo pangchake bikotgipa ine mesokna lekkarangko tariaha ine janapatskaengon, ia dolni manderang, koela a·kol nokgiparangoniko truck bolpraknan gong lak 1.27-oni gong lak 1.5-mangona ‘commission’-ni bimingo tangkarangko ra·enga ine ED parakataha.
Ia koelarangko Jogighopa-o donggipa depot-rango donenga aro ja·mano koelarangko ita so·ani karkana, iron & steel industry aro niam gri chalaienggipa koela so·ani karkanarangona salangskaenga ine ED parakataha.
Am·sandiani somoirango rim·gipa lekkarang aro dingtang dingtang koela a·damo kam ka·enggipa manager, koela nokgipa aro labour-rangni parakani gitade, ia koela a·kol damantionikon salprako bol 5 ba bol 7 truck garirang koelarangko salenga aro ia truck bolprakan ton 12-oni ton 16-mangni gita niam gri bikotgipa koelarangko salenga ine ma·sina man·aha.
