TURA: West Garo Hills a·jani Gomaijhora aro wilwilao donggipa dingtang dingtang biaprango Jio network-ko name man·jaengani a·sel neng·nikanirangko chagrongna nangtokenga ine iani bidingon ta·raken ja·kurangko de·china, West Garo Hills a·jani District Administration-ko didiataha.
Iani bidingo, West Garo Hills a·jani Deputy Commissioner-na badi ka·e sedoatengon, ia jolo songgipa Jio Mobile Tower, jasa batpile kam ka·jaengani a·sel songni manderang, network-ko man·jae neng·nikanirangko chagrongna nangtokenga ine Gomaijhora jolo songdongenggipa manderang parakataha.
Iani bidingo songni manderang, changni chang Jio company-ni official-rangna badi ka·e u·iatahaoba maming ja·kurangko de·chipkujaenga ineba songni manderang parakataha.
“Ia biapona tarigiparangko watatna ku·rachakaniko on·atahaoba ia tower kam ka·chipjaenga aro iani a·selan mobile network aro internet-rangko man·jae neng·nikanirangko chagrongna nangtokenga,” ine Gomaijhora jolo songdongenggipa manderang talataniko on·angaha.
Internet-ko man·jaengani a·sel poraienggipa chatro chatrirang, mongsongbate dingtang dingtang porikkarangna tarisamsoenggipa chatro chatrirang, neng·nikanirangko chagrongna nangtokenga ineba songni manderang parakataha.
Indake ong·engon, ia biapo donggipa Jio tower-ko ra·galenba, Airtel network-ni tower-ko songskachina gita songni manderang, West Garo Hills a·jani Deputy Commissioner-ko didiataha.