TURA: North Eastern Hill University (NEHU) Shillong campus-o dingtang dingtang a·sel aro golmalrang ong·enganichi Tura campus-naba nangchakeanirangko ra·baengani gimin NEHU Tura Campus-ko full fledged ba chu·gimik bil gnanggipa campus dake songchina NGCO aro AOSW dolrang, a·dok sorkario dabiangaha.
Iani bidingo NGCO-ni gita a·dokni Chief Minister Conrad K Sangman-na sedoatengon, NEHU Tura Campus-o chu·onga gita cholrang dongjani a·selo aro NEHU Shillong campus-o dingtang dingtang dake golmalrangko nikna man·rongengani a·selo Tura Campus-ni chatro chatrirang neng·nikanirangko chagrongna nangrongenga ine NEHU Tura campus-ko chu·gimik bil donggipa campus dake songchina didiataha.
“NEHU Tura Campus-ko dingtang dingtang program-rang baksa full fledged campus songgenchimode ian chatro chatrirangna poraianirango cholrangko on·dapani gita ong·gen aro skie ra·anio naljokanikoba on·na man·gen,” ine NGCO parakatenba, NEHU Tura Campus-ko chu·gimik bil gnanggipa Campus dake ra·gatna ta·raken kamrangko ka·china Chief Minister-ko didiataha.
Apsan daken AOSW dolba, NEHU Shillong Campus-o golmalrang ong·jringenganichi NEHU Tura campus-o poraienggipa chatro chatrirangna nangchakeaniko ra·baenga ine suk ong·gijaniko parakatenba, Tura Campus-ko Shillong campus-o pangchakna nangjana gita bilrangko aro dingtang dingtang cholrangko on·dapchina a·dok sorkariko didiataha.
Tura Campus-o chu·onga gita course-rang dongjani a·selan Garo Hills-ni chatro chatrirang, Shillong-onasa re·ange poraina gita nangenga ine janapatskaengon, NEHU Tura Campus-o pilak course-rangkon on·e chu·gimik bil gnanggipa campus dake ra·gatchina gita AOSW, a·dok sorkariko didiataha.
