SSLC porikkao teng·sugipa chatro chatrirangna Rakkam boksisrangko on·a

BAGHMARA: Ia 2025 bilsini Secondary School Leaving Certificate (SSLC) porikkao letter mark-rangko man·e, first division-o pass ka·anggipa Rongara-Siju constituency-ni chatro chatrirangna a·dokni Education Minister aro Rongara-Siju-ni MLA Rakkam A Sangma, mande ra·pilskaaniko dakangaha.
Rongara-Siju constituency-o chatro chatrirangko poraianirango gisik nangbatatna gita bilsibrina skangan letter mark man·e pass ka·giparangna tangka paisarangko boksis dake on·gen ine ua ku·rachakahani gimin ia program-ko ong·atanioba letter mark man·e pass ka·gipa chatro chatrirangna subject mingprako gong 5000/- ka·e tangkako boksis dake on·angjolaha.
Ia tom·anio a·dokni Education Minister Rakkam A Sangma, tom·anio bak ra·giparangna aganprakangengon, SSLC porikkao pass ka·gipa chatro chatrirangna, an·tangni namgipa skanirangko on·angenba, chatro chatrirangko gisiko nange poraichina didina gita letter mark man·gipa chatro chatrirangna tangka paisako boksis dake on·na ua bilsibrina skang a·bachengataha aro ia constituency-ni MLA ong·e dangdike on·angkua dipet ua iandake letter mark man·e pass ka·gipa chatro chatrirangna mikkangchiba apsan daken boksisrangko on·angkugen ine Sangma, ku·rachakaniko on·angaha.
Rongara-Siju constituency-o donggipa chatro chatrirangoni saoba, Top 10-o biapko man·e pass ka·genchimode ua chatro ba chatrina ua India a·songni je institute-oba admission-ko on·na gita an·tangan dakchake on·gen ineba constituency-ni MLA aro Education Minister, ku·rachakaniko on·angaha.