TURA: Tura-ko Winter/Second Capital songchina dabienggipani bidingo cholrangko nina gita a·dok sorkarini committee-ko songe on·angahani gimin iandake cholrangko nichae donggija aro chanchichagija Tura-ko Winter ba Second Capital songchina A·chik Holistic Awakening Movement (AHAM) dabiangskaaha.
Tura-ko Winter Capital songchina gita Garo Hills-o dingtang dingtang dolrang dabitokengani gimin adita salrangna skang ong·atanggipa Assembly-ni Budget Session-o, iani bidingo cholrangko nina aro chanchirimna gita pilak party-rangni bak ong·gipa committee-ko a·dokni Chief Minister songe on·angahachim ine nikna man·a. Ia committee-ni kamara, a·doko skotong songjinma damgni dongani namgni aro namgijanirangko am·sandie aro dingtang dingtang dolrang baksa agangrike sorkarina report-ko on·anian ong·engachim.
Indake ong·genchimoba, Tura-ko Winter Capital songani bidingo chanchirimkuna aro cholrangko nichengna sorkarini tik ka·aniko AHAM-ni president Georgeprince Ch Momin jegalatskaenba, songsal, ma·ambi aro sorkarini kamrangko nigrikesa Tura-ko Winter Capital songchina dabienga ine parakataha aro Tura-ko Winter Capital songanio am·sandina nangani kattarang dongjaha ine talataniko on·angaha.
Assam-o Dibrugarh-ko gnigipa skotong songjinma dake songani bidingo adita salrangna skang Chief Minister Himanta Biswa Sarma-ni parakatgipani gimin aro Nagpur-ko ru·uta somoirangonin Maharashtra-ni gnigipa skotong songjinma dake jakkalbaengani giminba ua talataniko on·angaha.
Jammu & Kashmir aro Himachal Pradesh a·dokrangoba apsan daken second capital-ko songani bidingo janapatskaengon, cholrangko nichengani gri aro chanchichengani gri Tura-ko Winter/Second Capital songchina AHAM-ni president dabiangaha.