TURA: Tura-ni Babupara-o donggipa Garo Labor Corps-ko gital dake rikpiltaianio maiba golmalrangchi ba ku·mong nangrimanirang dongjani a·selo kamrang ja·donggaatako man·jachina Association for Democracy & Empowerment (ADE) didiatenba, ia kamo pilak nanga dakchakanirangko on·na gita ia committee-ni chairman aro a·dokni Cabinet Minister Marcuise N Marak-na ku·rachakaniko on·ataha.
“Ia cenotaph-ara, a·gilsak gimikni gnigipa dakgrikanio an·tangtangko on·kange France a·songona re·anggipa A·chik pagitchamrangko gisik ra·na aro mande ra·na gita songe dongipa biapsa ong·ani gimin ian A·chikrangna namen gamchatbegipa gam gita ong·a. Indake ong·genchimoba, bang·gija dolrangni jegalani a·sel ia cenotaph-ko rikpiltaiani kamrang ja·donggaatako man·aha. Iandake jatna mongsonggipa kamko ka·anio kamrang ja·donggaatako man·na nangja ine chinga bebera·a. Uni gimin dingtang dingtang NGO-rang aro jatni dilgiparang baksa bakrime ia kamko ta·raken matchotatchina chinga mol·molenga,” ine ADE-ni president Dalseng Bira Ch Momin, committee-ni chairman aro Cabinet Minister Marcuise Marak-na sedoatgipa chittio parakataha.
A·chikrangna gamchatbegipa cenotaph-ko ripingna aro rikpiltaina gita ADR bakrimpaaniko on·enga ine janapatengon, ia kamrang da·o ja·donggaatako man·aniara kraani ong·ja ine ADE-ni president, pilak dolrangkon ia kamo bakrimchina gita didiataha.
“Cenotaph-ko gital dake rikpiltaianio aro taridapanio chinga an·tangtangni chol man·a gita bakrimaniko on·na kusi ong·aigen indiba ia cenotaph-ko rikpiltaianio adita golmalrang ong·katani a·sel ia mongsonggipa kamna chamgimin tangka paisarangko gipin kamrangna jakkalsretnaba gnang ine jatni gisepo kenchakanirang ong·enga. Uni gimin ia Cenotaph-na chamgimin tangka paisarangko gipin kamrangna jakkalna man·jana gita maming dongnuani gri kamrangko nirokchina chinga mol·molenga,” ine Momin parakataha.
