BAGHMARA: Ia 2025 bilsini Secondary School Leaving Cerficate (SSLC) porikkao name chu·sokanggipa Rongara-Siju constituency-ni chatro chatrirangna Bristibar salo, a·dokni Education Minister aro jolni MLA Rakkam A Sangma, South Garo Hills a·jani Karukol songo mande ra·pilskaaniko dakangaha.
SSLC porikkao namgipa mark-rangko man·e first division-o pass ka·anggipa chatro chatrirangna mande ra·pilskaani chin gita ua, tangka aro certificate-rangko on·angaha.
Ia program-ko ong·atanio a·dokni Education Minister, jinmana aganprakengon, MBOSE-ni ong·atanggipa SSLC porikkao name dakahani gimin dingtang dingtang skulni principal-rangko, skigiparangko aro chatro chatrirangko mittelpilangaha.
Ia chang SSLC porikkao Garo Hills gimiko nambatgipa pass percentage-ko man·ahani gimin ua South Garo Hills a·ja gimikni skulrangko aro chatro chatrirangna an·tangni namgipa skanirangkoba on·angaha.
Porikkana poraiengon ki·taprangonikosan ong·aigija dingtang dingtang cholrangkoba ra·china didiangengon, chatro chatrirangni namgnina sorkarini ra·gate on·gipa study material-rang aro app-rangko jakkalchina Education Minister, ku·pattianiko on·angaha.
Ia felicitation program-ko ong·atanio dingtang dingtang skulni chatro chatrirang, gitrangko ring·e aro chrok mesae manderangko an·saoatangaha.
