Shillong: Meghalaya SSA Schools Association (MSSASA), SSA teacher-rangni bidingo a·dok sorkari baksa agangriktaina tik ka·aha.
Jaiaw, Students’ Field-o general meeting-ko ong·atani ja·man kobor ra·timgiparang baksa agangrikmitingo MSSASA president Aristotle Rymbai, ‘SSA teacher-rangni chagronggipa neng·nikarangko namatna sorkarini ja·ku de·anirango namnikaniko parakaha.
Commissioner aro Secretary Vijay Kumar Mantri-ni dilanio Education Department baksa tom·anio chanchirimaniko memborrangna u·iatna tom·bimonganiko ong·ataha.
Education Department-ni mejaomangmang watgipa notification, jeon religious minorities, traditional bodies, private entities, NGOs aro civil society-rangni chalaigipa SSA school-rangko department-na pakwatna namnikpaaniko on·china mol·molani bidingo chanchirimaha.
Education-ni Union Ministry-ni on·gipa niamrangko ja·rikanio Education department, ja·ku de·aha.
Iarangni gisepon Rymbai, May 2 tariko sorkarini on·gipa notification-o Education Department-o chu·onggijanirangko namatna gital scheme-ko parakatna chanchiani bidingo aro a·dokni Performance Grading Index (PGI)-ko namdapatani gimin janapaha. Meghalaya-ni rank, gipin a·dokrangna baten bilongen komia.
“Gimik school-rangko Meghalaya Education Grant (MEG) -o napatgen, ia scheme- o napgipa school-rang uniform-ko man·gen.
Ia scheme-ni bidingo aganchakna gita sorkari, gimik stakeholder-rangna May 31 tarikona somoiko on·aha. School management committee, sponsoring bodies, parents’ association, teachers’ group aro academician-rangko aganchakchina u·iataha. Gimikni agananirangko knaani ja·man changsa ning·tubate chanchina tom·taigen.
Batanggimin April 15 tariko MSSASA, SSA school-rangna uamangni management-ko department-na pakwatna No Objection Certificates (NOCs)-ko on·na jajanio anti gittam somoiko on·cnina a·dok sorkariko mol·molaha. Sorkarina on·gipa memorandum-o bang·a school-rangan, uamangni School Management Committees (SMCS)-baksa meligrikanio neng·nikenga ine u·iataha.
