SHILLONG: Meghalaya a·doko tol·e tarigipa king 524 Election Photo Identity Card (EPIC)-rangko man·aha ine Sombar salo, a·dokni Chief Electoral Officer (CEO) BDR Tiwari parakataha.
Iani bidingo kobor ra·timgiparangna talataniko on·angengon, a·doko apsan nombor donggipa EPIC-rangko nikna man·aha ine Tiwari parakataha.
Iandake tol·e tarigipa EPIC-rangko gipin a·dokrangoba sandirokaha ine janapatengon, “A·doko sandie man·gipa EPIC-rangna gital nombor-rangko on·ataha,” ine CEO parakataha.
Election-o dilgiparangko seokgipa manderangna aro election-ni kamrangko ka·enggipa official-rangna, political dolrangna aro gipin dolrangna Election Commission, gital kolko tarienga ineba CEO parakataha.
Ia gital platform, jekon ECINET ine minga, iano Election Commission of India (ECI)-ni ming 40 mobile aro web application-rangko dongen ineba CEO parakataha. Ia ECINET-o election-ni pilak kamrangnan User Interface (UI) aro User Experience (UX)-rangba donggen.
Dingtang dingtang App-rangko download ka·anio aro log-in-rangko gisik ra·na nange, jakkalgiparang neng·nikanirangko chagrongna nangengani gimin ia gital App-ko ECI ra·gatna tik ka·aha.
Ia ECINET-ko ra·gatanichi a·song gimikni lak 10.5-na baten Booth Level Officer (BLO)-rang, Political party-rangni songgipa lak 15-mangni gita Booth Level Agent (BLA)-rang, lak 45-mangni gita polling official-rang, 15,597 Assistant Electoral Registration Officer (AERO)-rang, sak 4123 ERO-rang aro sak 767 District Election Officer (DEO)-rang namgniko man·gen ine ka·dongsoenga.
