TURA: Ia 2025 bilsini Higher Secondary School Leaving Certificate (HSSLC) porikkao Tura Don Bosco College (Higher Secondary Section)-oni chatro sakgniba Top 10-o biapko man·pae, Garo Hills gimikna mikkim rasongko ra·baaha.
Ia chatro sakgniara, Science stream-o 450 mark-rangko man·e, Top 10-ni chikkinggipa biapo chu·sokanggipa Samridhya Das aro Arts stream-o 448 mark-rangko man·e Top 10-ni brigipa biapo chu·sokanggipa Neev Sharma ong·a.
Uamang sakgnian, ia porikkao Top 10-ni biapko man·e pass ka·na man·ahani gimin an·tangtangni kusi ong·aniko parakataha aro an·tangtangni chatro chatriskarangnaba agan-ku·pattianirangko on·ataha.
An·tangni chu·sokgipa ong·anina kusi ong·aniko parakatengon, ia chu·sokaniko man·ahani gimin Science stream-o Top 10-ni chikkigipa biapko man·e pass ka·gipa Samridhya Das, an·tangni ma·a paako, skigiparangko aro una dakchakanirangko on·gipa college-ni pilak manderangkon mittelpilangaha.
Mikkangchi maiko dakna miksonganirang donga ine sing·anina aganchakaniko on·angengon, ua Electronic Engineering-ko dakna miksongengani gimin ia miksonganiko chu·sokatna kang·kare kaenga ine Das aganaha.
Chatro chatriskarangna maiba ku·pattianiko on·genma ine sing·on, an·tangtangni poraianio bimchipgiparang ong·anichi iandakgipa biterangko man·a ama ine Das parakataha.
Arts stream-o Top 10-ni brigipa biapko man·e pass ka·gipa Neev Sharma-ba an·tangni chu·sokgipa ong·anina skigiparangko, ma·a paako aro una dakchake on·gipa pilakkon mittelpilangaha.
Ia porikkana ua salantian konta bongaoni kontasnimangna poraiaha ine janapatengon, mikkangchiba ua iana bate nambata result-ko man·na krengangkugen ine Neev parakataha.
Saksa mingsinggipa ukil Jugal Kishore Sharma-ni su·gipa ong·e ua mikkangchi Bangalore-o BA LL.B-ko dakna miksongenga ineba Neev aganaha.
