SHILLONG: India aro Pakistan a·songni gisepo so·sojengjeng ong·engani gimin manderangni gisepo kenjagokanirang ong·katengon, cha·ani aro dingtang dingtang bosturangna jajrengjachina gita a·dok sorkari, a·doko songdongenggipa manderangna u·iataniko on·angaha.
A·song damgnini gisepo so·sojengjeng ong·anirangchi a·dokni manderangna kenchakna nanganirang ong·engon, a·doko man·enggipa cha·ani bosturangko nipilna gita Bristibar salo a·dokni Food & Civil Supplies Minister Comingone Ymbon, official-rang baksa tom·aniko ong·atangaha aro cha·ani bosturang da·o dipet a·doko chu·onga gita dongkuenga ine manderangko kenjagokjachina didiataha.
Tom·a matchotani ja·man kobor ra·timgipa manderang baksa agangrikengon, “A·song damgnini gisepo ong·enggipa obostarangni gimin da·alo anga, a·doko dongenggipa cha·ani bosturangko nipilna a·dokni pilak deputy commissioner aro sub-divisional officer-rang baksa tom·aniko ong·atangaha. Da·o dipet a·dokni pilak biaprangon cha·ani bosturang chu·onga gitan dongkuenga ine pilak DC aro SDO-rangan angna report-ko on·aha,” ine Ymbon parakataha.
Sing·anirangna aganchakaniko on·angkuengon, da·o dipet a·dokna metric ton 12,000-mangni gita merongrangko japrako nangenga ine Food & Civil Supplies Minister parakataha.
“Da·o dipet India sorkarioni maming ge·etanirangko on·kujaengoba, a·doko songdongenggipa manderang neng·nikanirangko man·jana gita chinga tarie dongna nangnikenga,” ine Ymbon aganaha.
A·doko songdongenggipa manderangko kenjagokjachina aro cha·ani bosturangna jajrengjachina didiatengon, “A·doko chu·onga gita cha·ani bosturang dongengani gimin manderang, kenjagoke koros ka·chichana nangjawa,” ine Ymbon parakataha.
Maiba neng·nikanirangko chagrongna nanggenchimode manderang, 1967 helpline nombor-ona ka·e u·iatna man·gen ineba Food & Civil Supplies Minister parakataha.