Dy CM-ni kosako maming ja·kurangko de·jaengani gimin sorkariko VPP matnanga
SHILLONG: Meghalaya a·doko bobil dake chakatenggipa Hynniewtrep National Liberation Council (HNLC) bobil dolna tangka paisarangko dakchake on·a ine a·kanganiko a·dokni Deputy Chief Minister Sniawbhalang Dhar jegalatenba, ian maming pangchakani gri matnanganirangsan ong·aia ine aganchakaniko on·angaha.
Congress sorkarini somoio da·o Deputy Chief Minister ong·enggipa Dhar, HNLC-na tangka paisarangko dakchake on·achim indiba 2018 bilsio National People’s Party (NPP)-o napangani ja·mande ua dakchakanirangko on·jaha ine adita salrangna skangsan HNLC matnangatahachim.
Deputy CM-ni kosako iandake matnanganirang ong·katahani gimin National Investigation Agency (NIA)-chi sandirokchina gita a·dokni Opposition dolrang, chong·motan Voice of the People’s Party (VPP) aro Congress dolrang dabitokahachim.
Iani bidingo jakgitele sandirokna man·na gita Cabinet Minister-ni kamko wate on·china gitaba Opposition dolrang dabitokengachim.
An·tangni kosako iandake matnanganirangna aganchakaniko on·angskaengon, ian uni bimingko ra·ongalna politics-ni gita chalakki dakanisan ong·aia aro uni kosako matnanganirangara maming pangchakani gri matnanganirangsan ong·aia ine Dhar a·kangatskaaha.
“Da·alo ian Mr A-na ong·enga, knalo haida Mr B ong·skanaba gnang,” ine Dhar aganenba, ua saksa dilgipa ong·e, a·dokni manderangna dangdike on·angkuaigen ine parakataha.
HNLC dolara champengatako man·gimin bobil dolsa ong·a aro iandakgipa dolrangni kosako warachakna gita sorkario chu·onga gitan cholrang donga ineba Deputy Chief Minister aganaha.
Kamtangko watchina opposition dolrangni dabienggipani bidingo sing·anina aganchakaniko on·angengon, uni kosako matnanganiara tol·e matnanganirangsan ong·aiani gimin ua kamtangko watna nangani katta dongja ine Dhar parakataha. Opposition dolrangde pangnan iandakgipa matnangani aro dabianirang dongrongaia ineba ua aganaha.
Indake ong·engon, HNLC bobil dolna dakchake on·a ine matnanganiko man·ani ja·manba a·dokni Deputy Chief Minister Sniawbhalang Dhar-ni kosako maming ja·kurangko de·jaengani gimin Voice of the People’s Party (VPP), a·dok sorkariko matnangatskaaha.
Deputy CM-ni kosako maming ja·kurangko de·jaengani gimin an·tangni suk ong·gijaniko parakatengon, “Chingni a·bachengo janapgimin gita ian namen gisiko nange kamko ka·na nanggipa kamsa ong·a maina a·dokni saksa deputy CM ong·e bobil dolni jako matnangako man·anide ramram katta ong·jaha. Iani bidingo sorkari gisiko nange jako ra·na nanga aro uko Cabinet-oniko ra·galna nangchongmota,” ine VPP-ni president Ardent Miller Basaiawmoit parakataha.
Dhar-ni kosako ainni gita ja·ku de·kujaskal ia kamko VPP dontongjawa ineba ua parakataha.
