TURA: Tura-ko Winter Capital songchina dabienggipani bidingo manderangna talatanirangko on·na gita A·chik State People’s Front (ASPF)-ni chang chikkinggipa tom·bimonganiko re·anggipa Sonibar salo, West Garo Hills a·jani Raksamgre-o ong·atangaha.
Ia tom·anio, Raksamgre jolo donggipa dingtang dingtang songni dilgiparang, Nokma-Sordarrang aro dingtang dingtang dolrangba bak ra·e, an·tangtangni agan-ku·pattianirangko on·angtokaha.
Ia tom·anio ASPF-ni secretary Bernita R Marak, chief organizing secretary Raksim Marak aro dingtang dingtang unit-ni dilgiparangba bak ra·angtokaha.
Ia tom·aniko ong·atani bidingo ASPF-ni secretary Bernita R Marak, tom·anio bak ra·giparangna talataniko on·angengon, Tura-ko Winter Capital songaniara Meghalaya a·dokko man·e on·dilanggipa pagitchamrangni ku·rachakgimin kattarangan ong·a aro iani bidingo A·chik a·songni manderangna u·iatna aro ia dabianio bakrimaniko on·china didina gita ASPF, Garo Hills-ni pilak biaprangon awareness program-rangko ong·atenga ine parakataha.
Garo Hills-ni namroro silroroanina Tura-ko Winter Capital songna nangchongmota ine janapatengon, ia dabianio Garo Hills-o songdongenggipa pilak manderangkon bakrimchina gita Marak didiangaha.
Ia dabianio Garo Hills-ni pilak dilgiparangkoba ku·cholsan ong·e bakrimchina gitaba ua didiangaha.
Ia tom·anio, Garoland State Movement Committee (GSMC)-ni acting chairman Balkarin Ch Marak-ba dongpae jinmana aganprakengon, Tura-ko Winter Capital songchina dabianiko chu·sokgipa ong·atna gitade, Garo Hills-o songdongenggipa pilak manderangni bakrimanikon nanggen ine parakataha.
Bon·kamao Constitution Rights Forum (CRF)-ni president Witjeng Marak-ba jinmana aganprakengon, mikkangchi Garo Hills-ni namroro silroroanina pilakkon apsan ku·mong nangrime kamrangko ka·na ine ku·monganiko on·angaha.
