SHILLONG: Garo Hills Autonomous District Council (GHADC)-o bang·en tangka paisarangko jakkalsretenga ine matnangenba Tura-ni MDC aro BJP-ni state vice president Bernard N Marak, iani bidingo sandirokanirangko dakchina a·dokni Director General of Police (DGP)-na FIR ka·doangaha.
Iani bidingo Marak, May-ni 2 tariko FIR ka·doangaha aro uni FIR-o parakani gitade, Sumit Kumar Jain Bohra minggipa mande saksa, an·tangko Chartered Accountant (CA) ine tol·enba GHADC-o consultant-ni kamko jako ra·ahachim.
Iandake ia mandeko GHADC-o CA dake rakkiani a·sel tangkarangko jakkalsretani aro 2014 bilsio ANVC baksa sonngigrikanio soi ka·grike ma·mong sorkarini chamatgipa tangka paisarangko jakkalsretaha ineba Marak, DGP-na sedoatgipa FIR-o parakataha.
GHADC-ni consultant-na songako man·gipa Bohra, CA degree-ba dongja aro Tribal council-na kam ka·na gita nangtelgipa Trading for Non-Tribal (TNT) licence-ba dongja aro ia mandeko GHADC-ni consultant dake rakkianiara niamni a·palo ong·enga ineba Tura-ni MDC parakataha.
Kajinarangko gamjani gimin Central GST Department-ni show cause notice on·gipani bidingoba ia FIR-o Marak, DGP-na u·iataha.
Marak-ni FIR-o parakani gitade, Jain-na GHADC, gong kror 8 batpile tangka paisarangko, changgittam dake gamna songgigrikaha aro dolgnini MoU-o soi ka·grikani gitade ian GST liability-o kror 32.04-mang gita ong·pilengachim.
GHADC-o tangka paisani gita neng·nikanirangko man·engani a·selan kam ka·giparangna baditaba jarangni dormaharangko on·na man·kujaengon GHADC-ni dilgiparang, iandake tol·gipa CA-ko consultant dake rakkienba tangka paisarangko gamna kusi ong·skaenga ineba Tura MDC parakataha.
