SHILLONG: Meghalaya a·doko, mongsongbate Khasi-Jaintia Hills a·jarangona rel garirangko ra·baani bidingo chanchirimna gita sorkarini songe on·enggipa pilak party-rangni committee-o Voice of the People’s Party (VPP) aro Congress dolrangde bak ra·pajana tik ka·ahani gimin ia committee-o pilak political dolrangkon bakrime, rel project-rangni bidingo an·tangtangni chanchianirangko on·china gita National People’s Party (NPP)-na ku·wattimgipa HM Shangliang didiataha.
“Rel garirangko ra·baani bidingo chanchirimna gita songe on·gipa committee-o bakrimchina chinga pilak political dolrangkon didienga. Pilak political dolni dilgiparangan apsan nangrime, rel garirangko ra·baanichi a·dokna namroro silroroaniko ra·baani bidingo chanchirimna gita a·dok sorkari dingtangmancha committee-ko songe on·aha,” ine Shangpliang, kobor ra·timgiparangna aganaha.
Congress aro VPP-ba a·dokni namroro silroroani aro dal·roroaniko nangnikenga ong·ode ia pilak party-rangni committee-o bakrimenba, an·tangtangni gamchatbegipa agan-ku·pattianirangko on·na nanga ineba ua aganaha.
“Pilak political dolrangan ku·cholsan ong·e bakrimgenchimosa a·dokna namroro silroroaniko ra·bana gita a·dok sorkari cholrangko sandina man·gen aro niam gri napsrukanirangko champengna gitaba cholrangko sandina man·gen,” ine VPP-ni dilgipa aganaha.
Rel garirangni gamchataniko ma·sina nangengani gimin janapatengon, “Rel garirangni gamchataniko ma·siani ja·man Mizoram gita dakgipa a·dokrangan rel garirangko ra·chakenga ong·ode ja·mano Meghalaya a·dokmangmangsan salgro salaram jolo rel garirang donggijagipa a·dok ong·ainaba dongaha,” ine Shangpliang parakataha.
Rel garirangko ra·baanichi a·dokona niam gri napsrukanirang batrorogen ine kenchakaniko namatna nangengani giminba Shangpliang janapataha.
“NPP-ba niam gri napsrukanirangkode nangnikja, uni giminsa an·chingna rel garirangkode nangenga indiba niam gri napsrukanirangko nangjaengani gimin chinga pilak political dolrang baksa chanchirimna nangnikenga. An·chingna namroro silroroaniko ra·bae, niam gri napsrukaniko chel·chakna gita cholrangko nangenga,” ine Shangpliang aganaha.
 |
ReplyForward
|
