TURA: Anti-Drugs Campaign ba pekatgipa samrangko warachakanio skulrango counsellor-rangko seokani aro Single Use Plastic Eco Recycling (SUPER) Campaign-ni gimin seoka man·gipa skulrangna talataniko on·na gita Sukrobar salo Drug Reduction Elimination & Action Mission (DREAM) project-ni bidingo workshop-ko Tura Dakopgre-o donggipa SMELC-ni Conference Hall-o ong·atangaha.
Ia tom·anio, School Education & Literacy-ni Director Banteilang J Kharshandi, jinmana aganprakangengon, DREAM project-ara, drugs jakkalaniko champengna aro drugs jakkale watna man·gija dongenggipa manderangna dakchakanirangko on·na Social Welfare department-ni ra·gatgipa project ong·a ine talataniko on·angaha.
Meghalaya a·doko aro mongsongbate East Khasi Hills a·jao ia drugs jakkalaniara mingsa namgijagipa bewal ong·enga ine janapatengon, drugs jakkalanirang skulrangon nikna man·batengani gimin a·dok sorkari, Shillong-ni Sanker Hospital baksa nangrime, skulrango poraienggipa chatro chatrirangna counseling ba ku·pattie on·aniko a·bachengatna tik ka·aha ine Kharshandi parakataha.
Ia program-ni mongsonggipa miksonganiara skulrangoniko skigiparangko seoke, ia skigiparangna Sanker Hospital-o jasani training-ko on·anggen aro iana training fee-ko DREAM project 50% aro skulni gita 50% gamgen ine ua aganaha.
Training matchotahaon ia skigiparang, skulrango aro songsaloba chadamberangna agan-ku·pattie on·anggen ine janapatengon, bilsi gittam ba bilsibrini gisepon Meghalaya a·dok drugs-oni jakgitel ong·na man·gen ine Kharshandi, an·tangni ka·dongchakenganiko parakatenba, ia kamo bakrimaniko on·china ua pilak skulni principal-rangko aro skigiparangko didiangaha.
SUPER campaign-ni bidingo talataniko on·angskaengon, ia program-ko adita salrangna skangsan a·dok sorkari, ‘My Meghalaya My Pride’ baksa nangrime Shillong-o a·bachengataha aro ia program-ni ning·o plastic jabolrangchi skul damsao toilet-ko rike on·aha ine Kharshandi parakatenba, ia apsan kamkon Tura-ni skul damsao aro ja·mano gipin skulrangoba ja·rikanggen ine talataniko on·angaha. Meghalaya a·dokko plastic-oni jakgitel ong·atna miksonge ia program-ko sorkari a·bachengataha ineba ua aganaha.
DREAM project-na seoka man·gipa skulrangara, Don Bosco Secondary School, St. Xaviers Higher Secondary School, Christian Girls Higher Secondary School, Government Boys Higher Secondary School, Government Girls Higher Secondary School, Hawakhana Higher Secondary School, St. Marys Higher Secondary School, Garo Union Higher Secondary School, Little Flower Secondary School, Aeroville Higher Secondary School, Christian Boys Higher Secondary School, Mount Sinai Secondary School, Nokrek Heights, Sherwood Secondary School, Captain Williamson Secondary School, Burny Hills Secondary School aro Monfort Centre for Education ong·a.
