TURA: Garo Hills-o cholgri ong·pagipa chatro chatrirang poraina cholrangko man·china ine Tura Government College-ni seat-rangko bariatchina gita Garo Students Union (GSU), a·dokni Education Minister Rakkam A Sangma-ko didiataha.
Iani bidingo a·dokni Education Minister-na sedoatengon, pangna bilsian Tura Govt College-o seat-rang chu·ongjani a·sel cholgri ong·pagipa chatro chatrirangde, private college-rango poraipana chol ong·jae, chubata gadangrango poraidapangna cholrangko man·jaenga ine GSU parakataha.
“Pangna bilsian Tura Govt College-o seat-rangko man·jae ritchani ritcha chatro chatrirang, chubata gadangrango poraidapangna chol man·jaenga. Iani a·selan mitam chatro chatrirangde poraiako dontongna draatako man·enga aro mitamrangde private college-rango poraina gita sro snamna nangtokenga,” ine GSU-ni president Tengsak Momin parakataha.
Tura Govt College-o seat-rang chu·ongrongjani a·selan Garo Hills-o chatro chatrirang, mongsongbate chatrirang, poraiako dontongrongtokenga ineba Momin parakataha.
Indake ong·engon, chatro chatrirangna chu·onga gita seat-rangko on·na man·na gita Arts, Science aro Commerce stream damgittamon seat-rangko bariatchina, classroom, laboratory-rangko rikdape, skigiparangkoba bariatchina GSU dabiangaha.
Chatro chatrirangna nangani kri scholarship-ko on·china aro BJP nokdangni chatro chatrirangna chu·gimik fee-rangko watchina gitaba GSU didiataha.
