Gov, MBoSE aro M’laya-ni institute-rangko NEP 2020-ko ja·rikchina didia

SHILLONG: Governor CH Vijayashankar, Meghalaya Board of School Education (MBoSE) aro a·dokni institute-rangko National Education Policy (NEP) 2020-o meli-nangrime kam ka·china mol·molataha. Jedakode a·dokni chadamberang gipin a·dokoni chadamberangna ja·manchakjawa.
Meja Sukrobar salo Shillong Raj Bhavan-o Governor SSLC aro HSSLC porikkao name pass ka·giparangko mande ra·aniko dakangao student-rangko mikkangchi nambate poraiange a·dokna aro a·songna mikkim rasongko ra·bachina didiangaha. Governor, MBoSE-ni kraa bewalo porikkako ong·atani giminba de·mittele, NEP 2020-ni miksonganirangko talate on·angaha.  Ia bilsini Secondary School Leaving Certificate (SSLC) aro Higher Secondary School Leaving Certificate (HSSLC)-ni porikkarango skanggipa gadango pass ka·gipa sakbonga chatro chatrirangna mande ra·pilskaaniko dakangenba uamangna certificate aro boksisrangkoba on·angaha. SSLC aro HSLC porikao skanggipa gadango pass ka·gipa sakbonga chatro chatrirangara- Saptarshi Bhattacharjee – 1st Position, HSSLC (Science), Laban Bengali Boys’ HSS; Idawanplishisha Swer – 1st Position, HSSLC (Arts), St. Edmund’s HSS; Disha Chokoni – 1st Position, HSSLC (Commerce), St. Anthony’s HSS; Leisha Agarwal – 1st Position, SSLC, St. Margaret’s HSS; aro Avila Kathrene P Lyngdoh – 1st Position, SSLC, North Liberty HSS.
Skanggipa gadango pass ka·e chu·sokgipa chatro chatrirangna Governor nama sikaniko on·angaha aro mikangchiba apsan dake nama gadango chu·sokgipa ong·china sakantikon didiangaha. “ Na·simangoni saoba Doctor, Engineer, aro dingtang dingtang gadango kam ka·e Meghalaya a·dokna aro India a·songna mikkim rasongko ra·bagiparang ong·gen” ine aganangaha. uamangni nama gadango chu·sokgipa ong·anina Meghalaya Board Of School Education (MBOSE)-koba porika seanirangko name dakahanina mittele kusi ong·aniko aganangaha.