TURA: Trinity College London-ni Music, Drama aro Spoken English-o porikkarangko ra·enggipani bidingo agan-talate on·na gita doka dam·anio gisik nanggipa manderangna agan-ku·pattianirangko on·na gita re·anggipa Sonibar salo, Garo Hills-o doka dam·ani aro ring·aniko skie on·enggipa Tura Music Academy, salsana Trinity Workshop-ko Tura-ni Don Bosco College-o ong·atangaha.
Ia workshop-ko ong·atanio, chatro chatrirang, ma·a paarang, skigiparang aro doka dam·anio gisik nanggipa manderang gimik sak 300-mangni gita bak ra·angtokaha.
Workshop-ko a·bachengatanio, Tura Music Academy-ni Director Tengrang R Sangma, rimchaksoani kattarangko aganangengon, ia workshop-ko ong·atani bidingo agan-talate on·angjolaha.
Ia workshop-o Trinity College London-ni skigipa Minette Duncan Marbaniang aro doka dam·aniko skie on·giparangoni saksa Givenstar Nongklaw, Trinity porikkako ra·ani, jinmani mikkango doke dam·e mesokani aro doka dam·aniko poraie seani bidingo agan-talatanirangko on·angaha.
Ja·mano, Trinity-ni Spoken English aro Drama course-rangni giminba jinmana agan-talatanirangko on·angaha.
Ia workshop-ko ong·atanio doka dam·aniko skie ra·enggipa chadambe sakgittam, chong·motan Alexier Cheangdo, Eariana M Sangma aro Demisha R Sangma, piano-ko doke mesokanichi manderangko an·saoatangaha aro uamangna Trinity College London-ni skigipaba, uamangni changa sapanirangko namdapatna gita agan-ku·pattianirangko on·dapangaha.
1
