SHILLONG: Re·baenggipa bilsion Meghalaya a·dokni Umroi Airport-o dal·kalgipa sildorengrang onchongna ka·dongsoengani gimin a·dokni Tourism-ba tang·doataniko man·gen ine a·dok sorkari ka·dongchakenga.
Tourism department-ni Commissioner & Secretary CVD Diengdoh-ni parakatani gitade, Shillong songjinmaoni dal·kalgipa sildorengrang bilna a·bachengahaon, a·dokona tourist-rangni sokanirangba batgnok ine sorkari ka·dongenga.
Shillong-ona dingtang dingtang biaprangoni manderang rona re·barongani gimin janapatengon, Guwahati airport-o bilonenggipa bang·bata manderangan Meghalaya a·dokona re·baenggiparangsa ong·a ine Diengdoh aganaha.
Umroi Airport-o sildorengrangko bang·bate onchongatna siengahani gimin aro tourist-rangni sokanirang bang·batgnok ine ka·dongsoengani gimin sorkari, tourist gari, training guide aro homestay-rangkoba bang·batatna kamrangko a·bachengskaengaha.
Umroi Airport-ni runway-ko bakrodapatani mikkang bilsini gisepon matchotna ka·dongengani gimin ia airport-o Airbus A320 aircraft-rang onchongna man·gnok aro dal·kalgipa sildorengrang onchongahaon, tourist-rangba bang·bate a·dokona re·bana man·gnok ine sorkari ka·dongenga.
Diengdoh-ni parakatani gitade, songadam nokadamrango tourist-rangna dongchakaniko on·na gita Meghalaya Homestay Scheme-ni subsidy-koba sorkari 70 percent-oni 80 percent-ona tang·doataha.