AMPATI: Sombar salo, Oppostion dolni dilgipa aro Songsak constituency-ni MLA Mukul Sangma, South West Garo Hills a·jani Ampati-o rikenggipa International Football Stadium-ko nieaha.
Ia stadium-ko nieanio ua, stadium-ko rikanio mai dakgipa neng·nikanirangko chagrongna nangenga, uarangko ma·sie ra·na gita Sports department-ni official-rang aro Project Management Consultant baksa agangrikangaha.
Ia stadium-o chirang joksruenga ine badi ka·anirangko man·ahani gimin an·tangni suk ong·gijaniko parakatengon, ia neng·nikanirangko ta·raken namatchina Sangma didiangaha. Ia stadium-o asongchakaniko tarienggipa biaprangko aro main gallery-o tarienggipa VIP seat-rangkoba Sangma niangaha.
Ia stadium-ko rikani gnigipa bakni bidingo una talate on·angengon, ia stadium-ni mongsonggipa bakrangko matchotna nangkuenga ine official-rang, Sangma-na talate on·aha.
Kamrangko ka·anio namjaengani gimin official-rangko sing·doangengon, ian International Football Stadium-sa ong·engani gimin kamrangko nambate ka·china Sangma didiangaha.
Neng·nikanirangko namatna jotton ka·gen aro kamrangko somoi gitan matchotatna jotton ka·gen ine Sports department-ni official-rang, Opposition dolni dilgipana ku·rachakaniko on·angaha.