SHILLONG: Robibar attamo, East Jaintia Hills a·jani Wahiajer song sambao, gari a·sel ong·e mande saksa siangani ja·man, songni manderang jinma ka·a ding·chaoenba, Star Cement company-ni compound-o dongipa bol 15 garirangko so·chipe galaha aro ia company-ni security guard-rangkoba chadrape, ia compound-o donggipa CCTV camera aro sentry gate-rangko nosto ka·e galaha.
District Administration-oni u·iatani gitade, Wahiajer song sambao Star Cement-ni truck gari aro pick-up truck gari bolsa chatinggrike a·sel ong·aha aro a·sel ong·ani ja·man Star Cement-ni truck gariko salgipa mande, truck gariko sale ua biaponi kataha. Ja·mano pick-up truck garini driver, gipinrang baksa Star Cement company-ona re·ange, ia truck gariko srapeaha aro ua biapona sokanga bakan pick-up truck garini driver, Star Cement-ni truck gario gadoe, truck garini driver-ko dokna a·bachengaha. Uni iandake dokani gimin Star Cement-ni truck driver, gariko sale katna jotton ka·on, pick-up truck garini driver-ko saldapa gita dakaha aro gari saldapako man·e ua, ua biapon siaha.
Iandake ia a·sel ong·ani ja·man jolo songdongenggipa manderang ka·a ding·chaoenba, atte aro gipin silchidarerangko ra·e, Star Cement compound-o tom·chimongeaha aro ia company-ni security guard-rangko chadrape, sentry post aro CCTV camera-rangkoba nosto ka·e galaha.
Sianggipa mandeni manggisikoba ia manderang ra·angna on·gija champenge dongtokaha.
Ja·mano, Lumshnong Police Station-ni police-rang, gipin sipai dolrang baksa so·sojengjeng ong·aniko namatna ua biapona re·baaha. Indake ong·genchimoba, ka·a ding·chaoenggipa manderang, ua biapo donenggipa bol 15 garirangko so·e galaha. Garirangko so·e galahani gimin ua biapona wa·al kimitgipa garirangko okamaton, manderang ia wa·al kimitgipa garirangkoba so·chipe galna jotton ka·aha aro ja·mano Star Cement-o kam ka·enggiparangkoba chadrapaha.
Ja·mano ua biapona adita sipai dolrangko okamdapatenba, manderangko katatna man·aha aro uandaken so·sojengjeng ong·aniko champengna man·aha.
