TURA: Ganol kosak jolrango donggipa biaprang, mongsongbate Rongram bazar jolrango skatang jabolrangko chio galatengani a·sel Ganol hydro project-ni dam-o jabolrangni sikkonge donganiko nikna man·engani gimin jolo songdongenggipa bang·a manderang suk ong·gijaniko parakattokaha.
Iani bidingo adita bilsirangna skangsan, West Garo Hills a·jani District Administration, u·iataniko on·enba, Ganol chibimao skatang jabolrangko galjachina mikrakataniko on·ahachim indiba da·alona kingkingan skatang chio jabolrangko galengani a·sel Ganol chibimao jabolrangko sikkonge donganiko nikna man·enga.
Ganol chibimao manderangni rona namnikgipa biaprang, jekai Pelga Dare, Sela Wari, Wa Wari aro uandakgipa biaprang donga aro ia biaprangara, manderangna picnic-rangko cha·chakna namgipa biaprangsan ong·aigija gipin biaprangoni re·baenggipa manderangko sokachakna namgipa biaprangba ong·e, songni nokni manderangna janggi tangani cholrangkoba on·na man·engachim.
Indake ong·genchimoba, Ganol chibimao skatang jabolrangko galengani a·sel ian Ganol chibimana nitogijaniko ra·baan baksana ian manderangna aro chio donggipa jonturangnaba namgijaniko ra·baani gita ong·skaenga.
Ia Ganol dam-o iandake jabolrangni sikkonge donganiko nike suk ong·gijaniko parakatengon, “Ia jabolrangara Rongram bazar dolongoniko mikka chirangchi man·bagipa jabolrang ong·a indide ia moilarangara an·chingni samtangtango ong·telaigiparangna maming nangchakeaniko ra·bajawama?” ine jolo songdongenggipa mande saksa sing·doatenba, Ganol chibimako rongtale rakkina gita ta·raken ja·kurangko de·china a·dok sorkariko didiataha.
