TURA: North Eastern Hill University (NEHU) Tura Campus-ko 1996 bilsini February jao kulichengaoni da·o bilsi 29 gappilengahaoba pilakni gitan galchipako man·enga aro namroro silroroanirang dongjaenga ine NEHU Tura Campus Staff Welfare Association (NTCSWA) parakatenba, ia campus-o namdapatna nanganirangko NEHU-ni Vice Chancellor-na seachi u·iataha.
NTCSWA-ni president TG Momin-ni parakatani gitade, ia campus-ko chalaiani da·o bilsi 29 gappilahaoba da·alonan Lower Division Clerk, Upper Division Clerk, Section Officer, Driver, Peon aro Chowkidar-ko man·chape non-teaching staff-na sanction post-rang dongkujaenga aro iani a·selan dingtang dingtang kamrangko ka·anio neng·nikanirangko chagrongna nangtokenga.
Plan proposal-rangko tarina gita Shillong-ona re·baanio University Grants Commission (UGC)-ni official-rangko Tura Campus-onade sokatjaha ine suk ong·gijaniko parakatengon, ian Tura Campus-ni nanganirangko UGC-na mesokatna man·gipa cholko galani ong·aha ine NTCSWA-ni president parakataha.
Indake ong·engon, mikkangchi NEHU Tura Campus-ko nambate chalaina man·na gita non-teaching-ni kamrangko Shillong aro Tura Campus-ni gisepo apsan suale on·china NTCSWA didiataha.
NEHU Shillong Campus-na on·enga gitan Tura Campus-naba apsan bilrangko on·chinaba NTCSWA didiataha.
Una agreba, Tura Campus-ni nok-jamrangko nambatatna man·na gita Engineering Cell-ko mangrakbatatchina, Tura Campus-ni Academic building-rangko rikdape on·china aro UGC-oni Tura Campus-ona tangka paisarangko joljol watatna gita cholrangko on·china NTCSWA-ni dilgiparang, NEHU-ni Vice Chancellor-ko didiataha.