TURA: South Garo Hills a·jani headquarter Baghmara-o donggipa MePDCL-o kam ka·giparang chu·ongjaengani a·sel kamrangko ka·anio neng·nikanirangko man·enga ine social activist Greneth M Sangma parakatenba, chu·onga gita lineman aro gipin kam ka·giparangko rakkichina, a·dokni Chief Minister-na sedoataha.
Chief Minister-na sedoatgipa chittio Sangma-ni parakatani gitade, Baghmara MePDCL-o da·o dipet kam ka·giparang sak 13-san dongaia aro iani a·selan bijoli nosto ong·ani somoirango aro dingtang dingtang kamrangko ka·anioba neng·nikanirangko chagrongna nangtokenga.
“Baghmara MePDCL-o kam ka·giparang chu·ongjani a·sel neng·nikanirangko chagrongna nangtokengani gimin komibeoba sak 36 lineman aro gital staff-ko rakkidapchina mol·molenga,” ine Sangma, Chief Minister-na sedoatgipa chittio parakataha.
2021 bilsini May b17 tariko mol·molata gitan division office-ko dal·batatna sanction ka·aha ine janapatengon, Nongalbibra-oni Baghmara-ona tower line project-ko da·onan a·bachengkujaenga ine ia project-ko ta·raken a·bachengatchina gita Sangma, Chief Minister-ko mol·molataha.
Una agreba, Sibbari Grid Station-ko ta·raken a·bachengatenba, South Garo Hills a·jani Karukol, Rongsu Asim aro Mindikgre songrangoba gital grid station-ko kulichina Sangma didiataha.