Sorkarini ra·gatgipa programrangara a·dokna niksamsoani gnang ra·gatgipasa: CM

SHILLONG: Meghalaya a·doko sorkarini ra·gatgipa scheme aro program-rangara, a·dokna niksamsoani gnang ra·gatgipa scheme aro program-rangsa ong·a ine Mongolbar salo, Shillong songjinmani U Soso Tham Auditorium-o SPARK program-ko ong·atanio a·dokni Chief Minister Conrad K Sangma a·kangataha.
Ia tom·anio, a·dokni Education Minister Rakkam A Sangma, Kharkutta-ni MLA Rupert M Momin, Education department-ni Secretary Swapnil Tembe, School Education & Literacy-ni Director Banteilang Kharshandi aro gipinrangba dongpae bak ra·angaha.
Ia tom·anio a·dokni Chief Minister, jinmana aganprakangengon, “Manderang bang·batan sorkariko, scheme aro program-rangosan kamrangko ka·aia ine chanchitoka indiba dingtang dingtang department-rango ra·gatgipa scheme aro program-rangara, a·dokna niksamsoni gnang ra·gatgipa program-rangsa ong·a,” ine aganaha.
Ia SPARK program-ko ong·atanio porikkarango teng·sugipa chatro chatrirangna tablet-rangko aro ia SPARK program-o bak ra·gipa skulrangna certificate-rangko Chief Minister aro gipin dilgiparangni jakchi on·angjolaha.
A·songo songdongenggipa manderangoni bang·batan bilsi 15-oni bilsi 19 ong·giparang ong·a aro Meghalaya a·dokode atchidaldaloni bilsi 4 ong·gipa bi·sarangan bang·batgiparang ong·e, 49 percent-de bilsi 20-ni ning·o ong·giparangan ong·a ine janapatengon, ian a·dokna ra·biani gita ong·genchimoba a·dokna namroro silroroani chol gitaba ong·skaani gimin sorkari, SPARK, Early Childhood Development Program, MPower, MGMP, YES Meghalaya, kal·susaani aro uandakgipa program-rango tangka paisarangko koros ka·enga ine Chief Minister parakataha.
“A·song mandeni jelbra jelsuaoniko namgniko man·na gitade chadamberangni janggi tangani pilak gadangrangon tangka paisarangko koros ka·na nangaia aro chonkuengmitingonin bi·sarangna dingtang dingtang program-rangko ra·gatanichi tangka paisarangko koros ka·gipa mitam a·dokrangoni Meghalaya a·dokba damsa ong·a. Iandakgipa program-rango tangka paisarangko koros ka·anide mikkangchi re·bana sienggipa bilsirangosa bite nangskana sienga,” ine ua aganaha.
Bilsi 9-oni bilsi 19-ona dal·droenggipa chadamberangni gimin janapatengon, iandakmiting bilsirangon chadamberang dingtang dingtang neng·nikanirangko chagrongbata aro nirok sandianiko nangani gimin chadamberangna dakchakanirangko aro agan-ku·pattianirangko on·na gita sorkari, Avenues gita dakgipa dolrang baksa SPARK aro uandakgipa program-rangchi kamrangko ka·enga ine Chief Minister parakataha.
A·dokni namroro silroroani bidingo janapatskaengon, a·songo nambatgipa a·dok ong·na gitade pilakan kamrangko ka·na aro korosrangko ka·na nangaigen aro dingtang dingtang neng·nikanirangko chagrongna nangengoba a·dok sorkari, a·dokko re·mikkangdilna kang·kare kae kamko ka·enga ine Chief Minister parakataha.