SHILLONG: Adita salrangna skang, Assam a·dokni skotong Guwahati songjinmao chi bananina Meghalaya a·dokkosa dos galtaiahani gimin iandake sakgipinko matnange dongaigija, a·doktangon nalarangko nambate tarichina gita Assam sorkariko didiataha.
Meghalaya a·doko a·brirangko cho·engani a·selsa Guwahati songjinmao chirang banengani gimin uni sorkari, Supreme Court-na badi ka·doangaha ine Budbar salo, Assam a·dokni Chief Minister Himanta Biswa Sarma aganani ja·man Meghalaya sorkariba aganchakaniko on·angskaaha.
Sarma-ni iandakgipa kattarangna aganchakaniko on·angengon, Meghalaya a·doko bol wa·arangko den·engani a·sel aro ramarangko tariengani a·sel Guwahati-o chi banenga ine matnanganiko a·dokni Disaster Management Minister Kyrmen Shylla raken jegalataha.
“Uamang an·tangtangan cholrangko sandina nanga aro chi bananiko champengnade nalarangko name tarina nanga. Nalarangko name tarichenggijade Meghalaya-ko matnange maming namgniko man·jawa,” ine Shylla aganenba, Guwahati songjinmao chi bananide songjinmani batroroenggipa neng·nikanisa ong·enga aro iako a·doktangon namatna nanga ine parakataha.
Iani bidingo Assam sorkarioniko uamang maming official-ni gita u·iataniko man·soade dongkuja ineba ua aganaha.
“Meghalaya a·dokni a·selsa Guwahati-o chi banenga ine Assam sorkarini seachi u·iatanikode da·o dipet chinga man·soa dongkuja. Sakgipinko matnangna skang name am·sandichengna nanga aro ianoni chi jokangbebegenchimoba ian ong·telaigipasa ong·aia maina Meghalaya a·dokan mikka wabatsranggipa biap ong·a,” ine Shylla aganaha.
Sakki baksa chanchirima nanganiko janapatengon, “Sakgipinko matnangnade namen altubea, indiba matnangani baksana sakkirangba dongskana nanga. Guwahati-o chi banani chingni a·selan ong·bebegenchimode chinga apsan agangrike namdapatanirangko dakna kusi ong·aigen. Indiba na·a chubata gadango dongenga ong·ode ka·machipaknade chide jokangtelaigen,” ine a·dokni Disaster Management Minister aganaha.