SHILLONG: North Eastern Hill University (NEHU)-ni kamrangko nipiltaina gita da·al Bristibar salni bako Union Education Ministry-ni official sakgni, NEHU-ona re·baenga.
Ia official-ranga, Higher Education Department-ni Additional Secretary Sunil Kumar Barnwal aro Director Subrat Kumar Pradhan ong·a aro uamang NEHU-ona re·bae, university-ni official-rang baksa tom·e chanchirimanggen.
Batanggimin sal somoirangonin NEHU-o so·sojengjeng ong·anirangchi university-ko chalaianio aro lekka porako on·anio neng·nikanirangko chagrongna nangengachim ine nikna man·a.
Official sakgnini NEHU-ona re·baengani gimin Education Ministry-ni Under Secretary DK Himanshu, NEHU-ni Vice Chancellor-na seachi u·iatengon, ia official-rang baksa tom·aniko ong·atna pilak nanga kamrangko tarisamsochina u·iataha.
Education Ministry-ni official-rangna chel·chakani aro nirok sandianirangko on·china gita a·dokni Chief Secretary aro Director General of Police (DGP)-naba seataha.
Koborko on·ani gitade, ia official-rang, Budbar walon Delhi-oni Guwahati-ona re·baaha aro uamang Guwahati-ni NEHU Guest House-o waltuenba, da·al Bristibar pring 7:00 bajio rama gita Shillong-ona re·baenga.