SHILLONG: Garo Hills-o Opposition dolrang, chong·motan Congress, Trinamool Congress (TMC) aro Voice of the People’s Party (VPP) dolrang bilakna man·kujaengani gimin National People’s Party (NPP)-na maming ra·bianirang dongja ine NPP-ni working president aro a·dokni Cabinet Minister Marcuise N Marak a·kangataha.
“A·songo Congress dolan gitchambatsranggipa party ong·a indiba da·ode Garo Hills-o bilgriaha. Uamangni bang·bata dilgiparangan NPP-o naptokaha. Batanggimin chang MP election-o Congress candidate, Garo Hills-o chegipa ong·ahaoba, party-ni gitade inditana bilakgipa ong·jaha,” ine Marak aganaha.
TMC dolni gimin janapatskaengon, party-ni bang·bata membor-rangan party-o donggenma, wate katgenma jajae dongtokenga ine Marak parakataha.
“Garo Hills-o TMC bilakna man·chipjaengani gimin bang·bata membor-rangan jajae dongtokenga aro Garo Hills-ni manderangba TMC-ko ra·chakna neng·niktoka,” ine NPP-ni working president aganaha.
TMC-ko dilenggiparangni gimin sing·skaon, iani giminde ua mamingkoba aganna jechakskaaha.
VPP-ni gimin janapatskaengon, “Garo Hills-o VPP-ko ra·chaknagipa manderangan dongkuja aro Garo Hills-ni manderangni ra·chakna man·gipa dilgiparangba uamango dongja,” ine Marak parakataha.
Politics-ode an·tangtangni neng·nikanirang dongaia ine janapatskaengon, NPP-ni manderang baksa bakrimanide pangnan apsan ong·e dongaienga ine Marak aganaha.
“Chinga manderang baksa kamrangko ka·rimna gitasa jotton ka·enga,” ine ua aganaha.
Re·baenggipa bilsini a·bachengachipakan Garo Hills Autonomous District Council (GHADC)-ni election-koba ong·atna siengahani gimin NPP, gipin dolrangni dilgiparangna do·garangko oe okamna a·bachengengaha.
“NPP-o napna agangrikenggiparangde donga aro chinga iako somoi ong·ahaon parakgen. Anga NPP-ni working president ong·e, a·ja ge·antion tom·anirangko ong·atgen aro party-ni dilgiparangko gronggen. Angna u·iatani gitade, gipin political dolrangni bang·a dilgiparangan NPP-o napna aro chingni nokdango bak ong·na nangniktokenga,” ine Marak aganaha.
Adita salrangna skang NPP-o rimnapgipa manderangni gimin janapatengon, “Adita salrangna skangsan chinga Rongjeng-o tom·aniko ong·ate, Rongjeng-ni gitcham MLA Sengnam M Marak aro gitcham MLA Francis Pondit R Sangma baksana sak 300-mangni gita manderangko NPP-ona rimchaksoaha,” ine NPP-ni working president parakataha.
Ia dilgiparang baksana Rongjeng-ni gitcham MLA Desang Sangma aro TMC-ni adita membor-rangba NPP-o napangtokaha.