Germany-o kam ka·na gita German Language Training program-ko a·bachengata

SHILLONG: Japan aro Singapore a·songrango kamko ka·na adita sak chadamberangko watatani ja·man da·o Germany a·songonaba sanna banani kamrangko ka·na gita a·dok sorkari, adita sak seoka man·gimin chadamberangko watatna Bristibar salo, German Language Training Program-ko Shillong Tech Park-o a·bachengataha.
Iana dingtangmancha, Labour, Employment & Skill Development Department-ni ning·o, Meghalaya State Skill Development Society (MSSDS)-ni dakchakanichi a·dok sorkari, German Language Training Program-ko a·bachengataha aro ia program-ko a·dokni Chief Minister Conrad K Sangma, Germany a·songni official-rang baksa a·bachengate on·angaha.
Ia training program-ko a·bachengate on·anganio a·dokni Chief Minister, jinmana aganprakangengon, Meghalaya a·doko chadamberangan jelbra jelsubatani gimin sorkari, chadamberangko dingtang dingtang a·songrangona kamrangko ka·na watatenga aro sak 30,000 chadamberangko, gipin a·songrangona watatna man·genchimoba japrakon gong kror 250-ko man·genchimode, bilsio gong kror 3000-kode ia chadamberangni nokdangrang man·sogen ine an·tangni ka·dongchakenganiko parakataha.
Chief Minister-ni aganani gitade, gipin a·songrango kamrangko ka·e cha·na watatako man·enggipa chadamberangna pilak nanga dakchakanirangko on·enga aro ia chadamberangna sorkari, naljokani aro pilak korosrangko on·esa gipin a·songrangona watatenga.
Seokako man·gipa skanggipa batch-ni chadamberangkode ua an·tangan Germany a·songona re·dilanggen ineba Chief Minister, ku·rachakaniko on·angaha.
Ia program-o seokako man·gipa candidate-rang jadokna German ku·sikko skie ra·gen aro uni ja·man, interview-rangko mikkangpae aro visa-rangko tarie Germany a·songni dingtang dingtang sanchakram biaprango kamrangko ka·na re·anggen ineba Chief Minister aganaha.
Ia tom·anio, German Consulate Kolkata-ni Deputy Consul General Andrea Jeske-ba jinmana aganprakengon, Germany a·songo sanna banani kamrangko ka·giparang chu·ongjaenga aro 2035 bilsini gisepode kamna skia man·gipa sak million 7 manderangko nanggnok ine parakataha.
Ia training program-ko Meghalaya-o ong·ataniara chadamberangni janggi tanganiko dingtangatna chol oe on·ani gita ong·enga maina ia chadamberang, Germany a·songo kamkosan ka·e dongaijawa indiba namroro silrorona, on·gilpana aro dal·rorona man·gnok ineba ua aganaha.