SHILLONG: Bristibar salo, North Eastern Hill University (NEHU) Shillong campus-ni dingtang dingtang dolrang, Union Education Ministry-oni re·bagipa official-rang baksa tom·aniko ong·atangenba, NEHU-ni Vice Chancellor Prof PS Shukla-ko ra·galchina dabiangtokaha.
Bristibar salo, Higher Education Department-ni Additional Secretary Sunil Kumar Barnwal aro Higher Education Department-ni Director Subrat Kumar Pradhan, NEHU-ko chalaianio chagrongna nangenggipa dingtang dingtang neng·nikanirangko nina gita Shillong-ona re·baaha aro uamangni re·baanio, NEHU-ni dingtang dingtang dolrang, official-rang baksa tom·enba, NEHU-ni VC-ko ra·galchina didiangtokaha.
Ia tom·aniko ong·atani bidingo sing·on, ia tom·aniko ‘namaha’ inesan Education official-rang aganchakaiaha indiba chu·gimikkode aganna gita jechakaiaha.
“Chinga University-ni pilak Dean-rang aro Department ge·antini Head-rang baksa tom·e chanchirimaha aro ia tom·aniara ramram tom·anisan ong·aia. Chinga University-ko namdapatna ku·cholsan kamrangko ka·anggen,” ine Higher Education Department-ni Additional Secretary aganaha.
Education official-rang baksa tom·ani ja·man NEHU Teachers Association (NEHUTA)-ni president Prof Lakhon Kma-ba kobor ra·timgipa manderang baksa agangrikengon, “NEHU-ko maikai chalaienga, regular VC gnang aro VC gri maikai kamko ka·enga iarangko nina gita ma·mongoni Education official-rang re·baaha aro chinga pilak neng·nikanirangkon uamangna talate on·ataha,” ine parakataha.
Prof Shukla-ko NEHU-ona watatpiltaijachina gitaba uamang Education Official-rangko mol·molataha ineba Prof Kma aganaha.
University ong·enggipa golmalrangko ma·mongoni re·bagipa official-rang aro University-ni dingtang dingtang dolrangba nangnikenga ine janapatengon, iana uamang dingtang dingtang cholrangko sandienga indiba da·o dipet kamrang matchotsrangkujaenga ine NEHUTA-ni president parakataha.
“Ma·mongoni re·bagipa official-rangba, Prof Shukla NEHU campus-ona re·bapilna cholrang dongjaha ine ma·sia, uni gimin da·alo chinga uamang baksa tom·e chanchirimani ja·man, uamang NEHU-ko tom·tomaona ra·bapilna maiba cholkode sandigen ine ka·dongenga,” ine Prof Kma aganaha.
NEHU-ko chalaianio chu·sokgijanirangko Education Ministry-ni gita sandirokatani gimin sing·anina aganchakaniko on·angengon, “Chinga iani bidingo uamango sing·aha aro uamang sandirokanikode matchotaha indiba nipiltaikuenga ine chingna aganaha. Uamang chingna talate aganangjahani gimin uamangni gisikrango mai donga, ukode chinga ma·sijaha,” ine Prof Kma aganaha.
Prof Kma-ni aganani gitade, Education official-rang baksa tom·anio, NEHU-ni VC Prof Shukla-de dongpajaha indiba Pro Vice Chancellor Prof SM Sungoh-sa ia tom·aniko dakdilaha.
Apsan daken NEHU Students Union (NEHUSU)-ni vice president Ricky Deiburom Rabon-ba ia tom·aniko chu·sokgipa ong·aha ine an·tangni chu·ongnikaniko parakataha. “Chinga ru·uta somoirangonin iandakgipa cholna senge dongengachim aro da·alo ma·mongni Education official-rang re·bae, chingni neng·nikanirangko knatime ra·angahani gimin chinga kusi ong·a. Chinga bebera·a ia university-o poraienggipa aro kam ka·enggipa manderangni nangnikani gita Higher Education Department, cholrangko ra·bagen,” ine ua aganaha.
