TURA: Meghalaya Board of School Education (MBOSE)-ni Secondary School Leaving Certificate (SSLC) porikkako pangna bilsian February aro March jarangosa ra·genchimoba ia changode ia porikkako December jaon ra·na gita Education department tik ka·ahani gimin iako Federation of A·chik Freedom (FAF) dol raken jegalataha.
“SSLC porikkako ia bilsini December jaon ra·na tik ka·ahani a·sel MBOSE-o kam ka·enggiparang namen neng·nikanirangko chagrongna nangtokenga. SSLC porikkako December jao ong·atna gita bakkandikbee u·iatahani a·sel MBOSE-o kam ka·enggiparang kamrangko ka·srapjaenga aro ian kamrangko sikkele ka·na draata gita ong·enga,” ine FAF-ni president Brinbal Sangma parakataha.
SSLC porikkarangna tarisamsona gita somoirangko nanga ine janapatengon, ia porikkana sikkele kamrangko ka·sogenchimode porikkako name ong·atna man·janaba gnang ine FAF-ni president, an·tangni jajrengchakenganiko parakataha.
“Chatro chatrirang aro skigiparang baksa maming chanchisamsoani gri iandake mongsonggipa porikkako sikkele ong·ataniara manderangni gisikrango jajrengna nanganiko ong·atenga. Uni gimin iani bidingo name chanchipiltaichina chinga sorkari aro MBOSE-ko didienga. Ia porikkako batanggimin bilsirango gitan apsan somoio ong·atna nanga,” ine Sangma parakataha.