SHILLONG: Batanggimin salrango mikkarang jimbee waanganichi Ganol hydro project-ni dam-o jabolrangni sikkate dongako nikna man·ahani gimin jolo songdongenggipa manderang matnangatani ja·man, ia jabolrangko ta·raken rongtalatna a·bachenggnok ine a·dokni Power Minister AT Mondal, ku·rachakaniko on·ataha.
Iani bidingo kobor ra·timgipa manderang baksa agangrikengon, “Ian manderangni nikanio nitogijanisan ong·jaenga indiba ia jabolrangchi Ganol hydro project-na nangchakeaniko ra·bana kenchakna nanganiba donga. Ia jabolrang, hydro project-ni ning·achi napenba chingni kolrangko nosto ka·naba gnang. Uni gimin ia jabolrangko ta·raken rongtalatna nangenga,” ine Mondal aganaha.
Ganol chibimao iandake jabolrangko sikkate donganiara ian skanggipa chang ong·ja ine janapatengon, “Mikkarang jime waahaode pangnan kosakoni jabolrangko ia dam-ona man·baronga maina Ganol ko·sakchi, manderangni anti cha·ram, picnic cha·ram aro dongchakram biaprang bang·en donga,” ine Mondal aganaha.
Iani bidingo ua West Garo Hills a·jani Deputy Commissioner baksa agangrikaha aro ia jabolrangko ta·raken rongtalatchina gita ge·etaniko on·ataha ineba Power Minister parakataha.
“Ia biapko DC an·tangan nieaha aro iani bidingo, Ganol kosako donggipa manderangna mikrakatanirangko on·china ua BDO-ko watataha. Iako chinga pangnan nirokjringna nangenga, ong·jaode mikka waa changantian ia biapo jabolrangni sikkate donganiko nikna man·aigen,” ine Mondal aganaha.
Ia jabolrangko Sukrobar salonin MePGCL-ni manderang rongtalatna a·bachengengaha ineba Power Minister parakataha.
“Iani bidingo anga a·dokni Chief Minister baksaba agangrikaha aro uaba mikkangchi iandakgipa obostarangko chagrongtaina nangjana gita cholrangko ra·gatani bidingo aganaha,” ine Mondal aganaha.
 |
ReplyForward
|