TURA: Selsella C&RD Block-o kam ka·enggiparangna dongchakani quarter-rangko on·china gita didie, Selsella jolo donggipa dingtang dingtang dolrang, chong·motan GSU, FKJGP, ADE, ASWA, NGCO, ANYO, GSMC aro ACHIK dolrangni nangrime bikotgipa All Selsella NGOs Alliance (ASNA), C&RD department-ni Director-na sedoataha.
ASNA-ni parakatani gitade, ia Selsella Block-ara a·doko gitchambatsranggipa block-rangoni damsa ong·engoba da·onan ia Block-o kam ka·giparangna quarter-rang dongkujachim.
“Selsella Block-o kam ka·enggiparangoni bang·batan Tura-onisa ong·a aro ia block-o uamangna dongchakani quarter-rang dongjani a·sel uamang salantian re·rurae kamrangko ka·na nangenga. Kamtango dongkame kamrangko ka·na man·jaengani a·selan uamangni kamrango, somoi gita office-ona sokanio aro an·seng baljokanioba nangchakeanirangko man·enga,” ine ASNA parakataha.
Selsella Block-o kam ka·enggiparangna dongchakani quarter-rangko on·anichi ian kam ka·giparangna kamrangko ka·anio altubatataniko on·an baksana jolo songdongenggipa manderangnaba namgni ong·gen ine Selsella-ni dingtang dingtang NGO-rang, C&RD department-ni Director-na sedoatgipa chittio parakataha.
“Selsella C&RD Block-ni gamchatgipa ong·aniko nie, gipin block-rango gitan ia block-naba dingtang dingtang nokrang, mongsongbate kam ka·enggipa manderangna ta·raken quarter-rangko rike on·na nangenga,” ine All Selsella NGOs Alliance (ASNA) parakataha.