New Delhi: (IANS) Rising Northeast summit-ko ong·atanichi 4.3 lak kror investment ba tangka botgiparangko salbaaha ian North Eastern Region (NER) -ko bilakatna dakchakgen ine Development of North Eastern Region (DoNER) Minister Jyotiraditya Scindia aganaha.
Summit-o dingtang dingtang dam 80 a·songrangoni delegation sokaha. Uandake ia summit-o man·gipa investment-rangara ‘Advantage Assam 2.0’-ni bak ong·ja ine Minister talataha.
Salgro salaram a·jako batanggimin bilsi 60 somoirangna galchipe donahachim, indiba bilsi 25 skang gitcham Prime Minister Atal Bihari Bajpayee, India a·song salgro salaram-oni tang·doaniko man·gen ine aganaha.
Batanggimin bilsi 2000-o Shillong-o global conference-ko ong·atao gitcham PM Vajpayee, bitchilko ge·aha, jean Prime Minister Narendra Modi-ni dilanio ua dal·begipa bol pilskaha, jeni biteara ‘Rising Northeast’ ong·a.
“Dam 11 dal·batgipa economy-rangoni India brigipa economy-ona sokaha. India, mikkangchi PM Modi-ni dilanio chuangkugen. PM Modi, salgro salaram a·jako tang·doatna raken kam ka·dilenga ine Scindia aganaha.
Uandake India jakgittel man·chengaoni galchipe donako PM Modi sorkarisa bilsi 2014-onin salgro salaram a·jako niataha, ua somoinisa ma·mong minister-rang salgro-salaram a·jaona re·bajringenga ine aganaha. Rising Northeast Summit-ko meja Sukrobar salo PM Modi a·bachengate on·aha.
Rising Northeast summit-o man·gipa investment-ko NER-na jakkalgen
Date:
Share post:
