TURA: Dadenggre Civil Sub-Division-na Open Market Sale Scheme (OMSS)-ni merongrangko sualani kamrang tik ong·jaenga ine All Meghalaya Minority Students Union (AMMSU) matnangataha.
“Dadenggre Civil Sub-Division-ni ning·o bang·bata biaprangan songadam nokadamrangsa ong·a aro OMSS rice allotment scheme-ara manderangna komia damrango merongrangko palna miksonge ra·gatgipa scheme-sa ong·a indiba 2025 bilsini May jao ia scheme-ni merongrangko tikatjahani gimin Dadenggre-o ia scheme-ko jako ra·enggipa manderang suk ong·gijaniko paraktokaha,” ine AMMSU-ni president Nur Islam parakataha.
Islam-ni parakatani gitade, April jao Dadenggre aro Tura-na apsan dake merongrangko sualna gimik quintal 2000-ko West Garo Hills a·jana chamatahachim aro ia merongrangna Dadenggre-ni supplier-rang, chu·gimik tangka paisarangko gamahaoba, merongrangkode sokatjahachim. May jaoba Dadenggre-na merongrangko tikatjaha aro chu·gimikkon Tura-onasa watgopataiaha ine AMMSU matnangataha.
May jao OMSS-ni merongrangko Tura-na quintal 4000-ona bariataha ineba AMMSU-ni president parakataha.
“Ian OMSS-ni ning·o merongrangko sualanio parak ong·gijani aro kragijaniko mesokani ong·engani gimin manderangni gisepo sing·anirang ong·katenga. Mitam supplier-rangko nichanggale, badiaba supplier-rangna mikkang nitee bosturangko on·aniara sorkarini scheme-o dongimin niamrangko pe·aniba ong·enga,” ine Islam parakataha.
AMMSU-ni parakatani gitade, Dadenggre-ni bang·bata supplier-rangan an·tangtangni nangchongmota lekkarangko on·ahachim indiba merongrangko tikatjaha.
“Dadenggre sub-division-ara songadam nokadamrangni sub-division ong·ani gimin ia jolrangnasa dam komiani merongrangko nangbatengachim indiba ia biaprangnasa merongrangko tikatskajaha,” ine AMMSU-ni president parakatenba, iani bidingo chu·gimikkon sandirokchina dabiangaha.
