RESUBELPARA: Sombar salo a·dokni Chief Minister Conrad K Sangma, Climate Action & Climate Adaptation Goals baksana dingtang dingtang project-rangko, North Garo Hills a·jani Mendipathar-o a·bachengate on·angaha.
Ia project-rangko a·bachengate on·anganio a·dokni PHE Minister Marcuise N Marak, Social Welfare Minister Paul Lyngdoh, Mendipathar-ni MLA Marthon Sangma, Kharkutta-ni MLA Rupert Momin aro gipinrangba dongpae bak ra·angaha.
Mendipathar-o gital rikgipa Girls Hostel aro Resubelpara-o gital rikgipa Tribal Hostel-koba ia apsan somoion Chief Minister-ni jakchi nokdonggae on·angaha.
Ia project-rangko a·bachengate on·anganio a·dokni Chief Minister, jinmana aganprakangengon, ADB-chi dakchake on·enggipa Climate Adaptive Community-Based Water Harvesting Project-ara gong kror 500-na batgipa project ong·a aro ia project-ko Meghalaya a·dokni pilak a·jarangon chirangko nambate man·na gita ra·gatanggen ine parakataha.
Ia salni bako ua, Climate Adaptive Community Based Water Harvesting Project-ni bak ong·gipa gong kror 47.19-ni ‘Megh Adapt Pay’ project-koba a·bachengate on·angaha. Ia project-ara, Soil & Water Conservation Department-ni buring bolgrimrangko tangatpilna, dongenggipa buring bolgrimrangko tange rakkina aro gama ge·anio jakkalenggipa a·arangko namdapatna ra·gatgipa project ong·a.
Ia project-chi songni manderang, sorkari baksa bakrime, buring bolgrimrangko chel·chakna, nosto ong·gimin a·arangko tangatpilna aro a·dok gimikon buring bolgrimrangko tangatpilna man·gen ine Chief Minister aganaha.
Mendipathar-o gital rikgipa Girls Hostel-ko gong kror 3 koros ong·e rikaha aro ia hostel-ko A·we Self Help Group chalaianggen. Resubelpara-ni Tribal Girls Hostel-ko gong kror 2.5 koros ong·e rikskaaha aro ia hostel-ko Ramke Memorial School chalaiangskagen.
Iani ja·man Bajengdoba C&RD Block-ni gital office nokkoba Chief Minister nokdonggae on·angjolaha.
