TURA: East Garo Hills a·jani block damgni, chong·motan Songsak C&RD Block aro Dambo Rongjeng C&RD Block-ni gital rikgipa Integrated Development Complex-rangko Budbar salo, a·dokni Chief Minister Conrad K Sangma-ni jakchi nokdonggae on·angaha.
Ia Integrated Development Complex-rangara, nosto ong·gimin sorkarini nokrangko taridapna aro manderangna dangdike on·aniko namdapatna Special Assistant to States for Capital Investment (SASCI) scheme-ni ning·o rikgipa nokrang ong·achim.
Songsak C&RD Block aro Dambo Rongjeng C&RD Block-ni gital Integrated Development Complex-rangko nokdonggae on·anganio a·dokni Chief Minister, jinmana aganprakangengon, SASCI scheme-ning·o a·dokni dingtang dingtang biaprango sorkarini gitcham nokrangko taridapna man·engaha ine ia scheme-na ma·mong sorkariko mittelpilangaha.
“Ia SASCI scheme-chi da·alo an·chingni block office-rangkoba nambate rikna man·aha maina ia block office-rangko ru·utbea bilsirangna maming taridapani gri galchipe donna nangahachim,” ine Sangma aganaha.
Chief Minister-ni parakatani gitade, a·doko gimik dam 56 Community & Rural Development (C&RD) Block-rang gnang aro ianoni bang·bata office-rangan da·o gital dake taridapaniko man·tokengaha.
“Ia block office-rangko gital dake taridapani miksonganide, songadam nokadamrango manderangna dangdike on·enggipa dingtang dingtang department-ni manderangna kamrangko ka·tona aro dongtoaniko on·anian ong·enga,” ine Sangma aganaha.
Dingtang dingtang department-rango kam ka·enggipa manderangna sorkari, staff quarter-rangko rike on·na tik ka·aha ine janapatengon, a·dokni dingtang dingtang block-rangko namdapatna gita gong kror 120-na baten tangka paisarangko chamataha ine Chief Minister parakataha.