SHILLONG: Madhya Pradesh a·dokoni re·bagipa tourist sakgnini Sohra jolo gimaenggipani bidingo koborko seanio Meghalaya a·dokko ‘crime prone’ ba ‘ong·gija kamrang ong·ronggipa’ biap ine a·songni songbad kingsao seahani gimin Sukrobar salo, Meghalaya Tourism Development Forum (MTDF) jegalatenba, salgro salaram a·dokrangni gimin maiba koborrangko seengon pangnan simsake sechina national media-rangko didiataha.
“Chingni a·briarigipa a·dokko ong·gija kamrang ong·ronggipa ine a·songni songbad kingsao seaniara namen kragijani ong·a ine chinga aganchakna ska. Iandake songbadrango seaniara Meghalaya-ko ba Khasi Hills-ko ‘ong·gija dakgipa biap’ inesa manderangna mesokani gita ong·aha aro ian dilsretani aro jegalaniko man·na krachongmota,” ine Sukrobar salo, MTDF-ni president Larsing Sawian, kobor ra·timgiparangna aganaha.
“An·ching pilakan ma·sia chinga Meghalaya-ni manderangde tom·tomaniko namnikgiparangsa ong·a aro chinga pangnan gipin biaprangoni re·bagiparangko nokchakna kusi ong·giparang ong·e, da·alona kingking Meghalaya-ona re·baenggipa tourist-rangni kosako changsaba ong·gija dakanirang dongkujachim,” ine Sawian parakatenba, a·dokko ‘crime prone’ ine seaniara namen ra·chakna man·gijani ong·a aro mikkangchi Meghalaya a·dokona re·bana sienggipa manderangnaba ong·gija dake gisiko naataniko ra·baani ong·gen ine iani bidingo talataniko on·china songbad nokgiparangko didiataha.
Sohra jolo gimaenggipa tourist sakgniko man·pilkujaengani gimin an·tangni suk ong·gijaniko parakatengon, dingtang dingtang dolrangni sandianichi uamangko tom·tomaon maming a·sel nanga gri man·pilgen ine Sawian, an·tangni ka·dongchakenganiko parakataha.
Batanggimin bilsi 10 ba bilsi bongani gisepo Meghalaya a·dokni Sohra, Cherrapunjee, Dawki aro uandakgipa biaprangona manderangni sokanirang tang·dobatahani gimin a·doko tourism-ni dal·roroenganiko nikna man·enga ineba NTDF-ni president aganaha.
“Kakketko agangenchimode da·ororo Meghalaya-ona re·baenggipa manderang bang·batan Shillong-ona bate ia biaprangonasa re·battokenga aro ian a·dokni ong·a obostako mesokani ong·enga. Ian Meghalaya aro Khasi Hills-o songdongenggipa manderangna janggi tangani cholrang ong·skaenga,” ine Sawian aganaha.
“India a·songo salgro salaram jolni dal·roroani golpo a·bachengaha aro dal·roroe re·mikkangenga. Uni gimin a·songni media-rang, salgro salaram jolni gimin koborrangko seengon, simsakbate sechina chinga mol·molatenga,” ine NTDF president parakataha.
“Chinga chingni man·na nangani kri matnanganirangkoba ra·chakna kusi ong·aia aro maikoba namdapatna nanganirang donggenchimoba chinga an·tangtangni jakrangko songdona kusi ong·aigen indiba chingni gimin ong·gija koborko a·song gimikna poraichina national media-o seatenga ong·ode chinga iako ra·chakna man·chongmotja, uni gimin iandakgipa koborrangko seanio pangnan simsakchina aro pangnan kakket koborkosa on·china chinga mol·molenga,” ine Sawian parakataha.