TURA: Tura Medical College & Hospital (TMCH)-ko Public-Private Partnership (PPP) Mode-o chalaina gita a·dok sorkarini tender-ko on·enganiara 2014 bilsio A·chik National Volunteers Council (ANVC) dolrangni a·dok aro ma·mong sorkarirang baksa songgigrikanio soi ka·grikaniko pe·ani ong·enga ine Sukrobar salo, Tura-ni MDC aro ANVC-B dolni gitcham chairman Bernard N Marak parakataha.
2014 bilsio ANVC dolrangni sorkari baksa songgigrikani gitade, ia hospital, Garo Hills Autonomous District Council (GHADC)-ni ning·osa ong·na nanga aro a·dok sorkarini ning·ode ong·na nangjaenga ineba Tura MDC parakataha.
“Ia Tura medical college aro Hospital-ara 2014 bilsio ANVC-B, ma·mong sorkari aro a·dok sorkarini gisepo songgigrikani bitesa ong·a aro iako songgrikanio Para 5.1-o talen janapani donga. Ian Tura Medical College, General Nursing & Midwifery School, Para-Medical Institute aro Tura-o Women & Children’s Hospital-ko man·chape Garo Hills-o sanna banani kamrangko skie ra·aniko namdapatanian ong·a,” ine Marak parakataha.
Tura medical college-ni hospital-ko chalaianio jak on·pagija hospital-ko GHADC-ni ning·o chalaina on·china gitaba Tura-ni MDC, a·dok sorkariko didiataha.
ANVC dolrangni songgigrikaniko chu·sokatna gita state level monitoring committee-ko songjahani giminba Marak, a·dok sorkariko matnangattaiaha aro UAPA-ni ning·o uamangni kosako case ka·e rona jotton ka·aha ineba matnangataha.
Tura Medical College & Hospital-ko PPP mode-o chalaina tender on·aniara ANVC dolrangni sorkarirang baksa songgigrikaniko pe·ani gita ong·enga ine iana tender on·aniko dontongpilchina gitaba Tura MDC aro ANVC-B-ni gitcham chairman, a·dok sorkariko didiataha.
