SHILLONG: Madhya Pradesh a·dokni tourist sakgnini Sohra jolo gimaenggipani bidingo ‘politics kal·na’ jotton ka·enga ine matnanganirangko a·dokni Bharatiya Janata Party (BJP) jegalatenba, ian constituency-tango dilgipani kamko ka·anisa ong·enga aro politics kal·na miksongani ong·ja ine parakataha.
Iani bidingo kobor ra·timgipa manderang baksa agangrikengon, Sohra jolo tourist sakgnini gimaenggipani gimin ku·rang on·anichi politics kal·na jotton ka·enga ine matnangako BJP-ni chief spokesperson Mariahom Kharkrang jegalatenba, ian gimaenggipa manderangna uamangni simsakaniko mesokanisa ong·a aro politics kal·na miksongani ong·ja ine parakataha.
“Uamangni constituency-o saoba gimaa ong·ode uamangba apsan daken ku·rang on·aigen aro Meghalaya ba je biapoba apsan daken saoba gimaa ong·ode chingni dilgiparangba uamangni namgnina ku·rangko on·telaigen. Gimaenggipa manderangko man·pilna gita dilgipa ong·e, an·tangtangni ma·sigipa manderang baksade agangrikaigen,” ine Kharkrang aganaha.
Seokako man·gipa dilgiparangde an·tangtangni manderangna kamko ka·na nangaia aro manderangba uamangni dakchakanirangna ka·dongsoronga ineba BJP-ni dilgipa aganaha.
“Uamang manderangni dilgipa ong·e, iandakgipa kamrangko jako ra·na bil donga maina ian manderangni namgninasa ong·enga. Iani bidingo BJP ‘politics’ kal·na jotton ka·enga ine agananiara bi·sarangni matnangani gitasa ong·aia maina na·a ku·rang on·oba nang·ko matnangaia, na·a ku·rang on·jaoba nang·ko matnangaia. Dilgiparang maming ku·rangko on·gija dongode kamkon ka·ja inesa ingen aro ku·rang on·oba iandake matnanganirangko man·skaa,” ine Kharkrang aganaha.
Sohra jolrangko ‘crime prone’ ba ‘ong·gija kamrangko nikna man·ronggipa’ biap ine a·songni songbad kingsao seanikoba BJP-ni dilgipa raken jegalataha. Sohra jolrangkode biap an·senganina aro manderangni rona namnikgipa ong·ani giminsa mingsing minggama ineba ua talataniko on·angaha.
“Ia biaprangko iandake seaniara namen kragijani ong·a aro je mandean iako seahachim, ua name sandichenggijasa seaha. A·selde je biapoba ong·na man·aia aro iandakgipa a·sel ong·aiani gimin uko ‘crime prone’ ine agananide namen dal·bea gualani ong·a. Sohra gita dakgipa biaprangode iandakgipa a·selrangko nikna man·rongja. Anga an·tangba adita bilsirangna Sohra-o SDPO ong·e kamko ka·aha indiba ua somoirango iandakgipa a·sel ong·anirangko nikna man·rongjachim. Sohra jolrangko iandake matnanganide dal·bea gualani ong·a,” ine Kharkrang aganaha.