TURA: South Garo Hills a·jao Gasuapara Block-ni ning·o donggipa Wakskogre VEC-ni MGNREGS project-ko matchotgija galchipa aro hajirarangkoba bon·e gamja job card holder-rangni pal social activist Greneth M Sangma parakatenba, iani bidingo Gasuapara Block-ni Block Development Officer (BDO)-ni kosako sandirokchina dabie, Anti Corruption Branch-ni Inspector General of Police (IGP)-na sedoataha.
Sangma-ni parakatani gitade, iani bidingo songni manderang, re·anggipa May jani 29 tariko tom·e chanchirimangaha aro kamrangko matchotja baksana job card holder-rangna hajirarangko matchote gamjani gimin aro VEC-ni term bon·ani ja·manoba election-ko ong·atchipkujaengani gimin suk ong·gijaniko parakangtokaha.
“Ia tom·anio job card holder-rangni aganani gitade, kamko 2024 bilsini February jao a·bachengate salgninasan ka·aiaha aro uni ja·man ia project-ko galchipaiaha. Secretary-ni talatanikoba songni manderang chu·ongniktokjaha,” ine Sangma parakataha.
Ia project-ko sal 60-na tik ka·ahaoba kam ka·giparangna sak 32-ni hajirakosan on·aiaha aro bangki hajirarangko secretary gamna man·gijaniko aganaha ineba Sangma parakataha.
VEC-ni term bon·ani ja·manba ia VEC-ni election-ko ong·atchipkujaengani giminba songni manderang, iani bidingo nanga gita ja·kurangko de·china dabiangtokaha ineba Sangma parakataha.
“Uni gimin kakketko ma·sina gita inquiry-ko dakchina aro matchotgija dongenggipa project-rangni bidingo BDO aro gipin official-rangni kosako nanga gita ja·kurangko de·china anga job card holder-rangni pal nang·ko didienga,” ine Sangma, Anti-Corruption Branch-ni IGP-na sedoatgipa chittio janapatenba, project-ko ta·raken matchotatchina aro ia VEC-ni election-ko ong·atchina dabiangaha.