BAJENGDOBA: North Garo Hills a·jani Bajengdoba jolo donggipa Upper Nengsa Wakso Government LP skulo, skigipa saksaan Nursery-oni Class V-ona kingking gimik sak 62 chatro chatrirangko skina nange neng·nikanirangko chagrongna nangenga ine A·chik Holistic Awakening Movement (AHAM) Bajengdoba regional unit parakatenba, ia skulko nirokatchina gita a·dokni Education Minister Rakkam A Sangma-ko didiataha.
AHAM Bajengdoba regional unit-ni parakatani gitade, ia skulo skigipasan chu·ongjaenga ong·ja indiba skul nokni obostarangba namsrangjahani a·sel poraienggipa chatro chatrirang aro skigipaba neng·nikanirangko chagrongna nangtokenga.
“Ia skulo Nursery-oni Class V-ona poraienggipa chatro chatrirang gimik sak 62 donga aro ia chatro chatrirangna skigipa saksanchi skie on·aniara chanchisokna ampilgijani ong·a. Una agreba ia skulo asongchakani aro sechakanirangba chu·onga gita dongjani a·sel chatro chatrirang, a·arangosa asonge sena nangtokenga,” ine AHAM Bajengdoba regional unit parakataha.
AHAM Bajengdoba unit-ni parakatani gitade, ia skulo rongtalgipa ringani chirangba dongja aro toilet-rangba nama dongjani a·sel neng·nikanirangko chagrongna nangtokenga.
“Skul nokni obostaba namsrangjaha maina ia skul nokni nokkingrang selprupruani a·selan da·o gita wachini somoirangode class-rangkon ka·na man·jaenga,” ine AHAM Bajengdoba regional unit parakatenba, ia skul nokko ta·raken tarie on·china, ia skulna nangchongmotgipa pilak cholrangkon chu·onga gita on·china aro skigiparangkoba rakkidapchina a·dokni Education Minister-ko didiataha.