TURA: A·dokni deficit skulrango skigiparang, re·anggipa March jaonin jagittamni dormaharangko man·tokkujaengani a·sel neng·nikanirangko chagrongna nangtokengaha Garo Hills Deficit School Teachers & Employees Association (GHDSTEA) parakatenba, ia dormaharangko ta·raken on·china sorkariko didiataha.
GHDSTEA-ni parakatani gitade, deficit skulrango skigiparang, March jaonin dormaharangko man·tokkujaengani a·sel bi·sarangna skul admission aro gipin nangchongmota korosrangna tangka paisarang dongjae neng·nikanirangko chagrongna nangtokengaha.
“Iandake jagittamni dormaharangko man·chipkujaengani a·selan a·doko lekka porako on·na gita an·tangtangko on·kange kam ka·enggipa manderang chaktopilgija dukrangko chakna nangtokenga,” ine GHDSTEA-ni president James D Shira parakataha.
Shira-ni parakatani gitade, re·anggipa May 22 tarikosan a·dok gimikni deficit skigiparang, a·dokni Education Minister Rakkam A Sangma-ko gronge agangrikon, skigiparangna bangki dormaharangko adita salrangni gisepon on·gnok ine ku·rachakaniko on·atahachim. Uni ja·man May-ni 28 tarikoba deficit skulrango skigiparang, a·dokni Chief Minister Conrad K Sangma-ko gronge, an·tangtangni man·na nangkuenggipa dormaharangni bidingo agangrikon, uaba skigiparangni dormaharangko niatna ku·rachakaniko on·angahachim.
“Jagittamni dormaharangko man·kujaengani a·selan skigiparangoni bang·batan, nok para, bijolini kajina aro nangchongmota korosrangko ka·na man·jae neng·nikanirangko chagrongna nangtokenga. Dormaharangko man·jaengani a·selan skigiparang kamtangtangkoba name ka·na man·tokjaenga. Uasan ong·aigija chinga chingni dedrangrangni skul fee-rang, uniform-rang aro bi·sarangna cha·ani ringanirangkoba brena chol ong·tokjaenga,” ine GHDSTEA-ni president parakataha.
Ia jagittamni dormaharangko ta·raken on·ja ong·ode skigiparang, kamtangtangko dontongate jingjengatna nangao ga·akgen ineba Shira mikrakataniko on·angaha.