TURA: Tikrikilla C&RD Block-ni ning·o Gondagre aro Rongsai songrangna gram sevak-ni kamko ka·enggipa mande saksa, dingtang dingtang scheme-rangna, manderangoniko tangka dabie ra·enga ine A·chik Dedicated Integrity Leaders (ADIL) Tikrikilla regional unit, Tikrikilla C&RD Block-ni Block Development Officer (BDO)-na badi ka·doangaha.
Iani bidingo Tikrikilla C&RD Block-ni BDO-na badi ka·e sedoatengon, Gondagre aro Rongsai songni gram sevak, Pradhan Mantri Awas Yojana (PMAY) scheme-ni dingtang dingtang kamrangko ka·anio songni manderangoniko tangka dabie ra·enga ine ADIL Tikrikilla regional unit-ni dilgiparang parakataha.
“Gondagre aro Rongsai songni gram sevak, PMAY scheme-na geo-tagging aro nok rikani kamrangnaba manderangoniko gong 500-oni gong 5000-ona kingking tangkarangko dabie ra·enga aro iani a·selan ia songrango PMAY scheme-ko man·paenggipa manderangba neng·nikanirangko chagrongna nangtokenga. Chinga ADIL dolni gita ia songrango PMAY scheme-ni namgniko man·enggipa manderango aro mikrontangchi nikgipa manderangoniko sing·sandienba nanga gita sakkirangko man·aha,” ine ADIL Tikrikilla regional unit-ni dilgiparang parakataha.
VEC-ni secretary-ba MGNREGA-ni kamrangna, mande sakprakoniko gong 500 ka·e tangka gile ra·enga ineba ADIL Tikrikilla regional unit-ni dilgiparang matnangataha.
“Uni gimin chinga ia gram sevak aro VEC secretary-ni kosako ta·raken inquiry-ko dakchina aro nanga gita ja·kurangko de·china mol·molatenga,” ine ADIL Tikrikilla regional unit-ni dilgiparang, Tikrikilla Block-ni BDO-na sedoatgipa chittio janapataha.
