RESUBELPARA: North Garo Hills a·jani Wageasi songo, Garo Hills Autonomous District Council (GHADC)-ni weighbridge-ko songani gimin social activist Nilbath Marak sing·doataha.
Ia bilsini a·bachengachipaksan, Wageasi-oni kilometer 5-mang chel·ao donggipa Depa Garat songoba sorkarini ra·chakgipa weighbridge-ko songani ja·man da·o Wageasi-oba GHADC-ni weighbridge-ko kulidapahani gimin Marak sing·doataha.
Koborko on·ani gitade, Depa Garat songo kuligipa weighbridge-ko a·dok sorkarini Transport department chalaiengachim.
Depa Garat songo weighbridge-ko kuliani ja·man da·o Wageasi-oba weighbridge-ko kulidaptaianichi ma·manti bosturangko salruraenggipa garirang, biap samba jolon changgni dake kajinako gamna nangengani a·sel neng·nikanirangko chagrongna nangtokenga ine Marak parakataha.
Iana skangba ia jolrango GHADC-ni weighbridge aro monopoly gate-rangko kulina jotton ka·ahachim indiba badi ka·anirangko man·ani ja·man ia weighbridge aro monopoly gate-rangko district administration, pe·e galtokaha.
Ia National Highway (NH-62) rama gita West Khasi Hills aro South Garo Hills a·jani koelarangko salrurana jakkalengachim.
“Dingtang dingtang a·ningni bosturangoniko gile man·gipa kajinarangoniko a·dok sorkari, GHADC-naba bak suale on·enga indide maini gimin truck garirangoniko aro gari nokgiparangoniko GHADC, kajinarangko gildapna nangkuenga? Ia gate-rango kajinarangko gilanina maming receipt-rangkoba on·jaengani gimin Garo Hills-nade maming man·gni dongjaenga indiba mitam manderangsan man·e cha·enga. Iandakgipa weighbridge-rangko kulianiara niamni a·palo ong·a, uni gimin district administration ta·raken ja·kurangko de·na nanga,” ine Marak didiataha.
Indake ong·engon, iani bidingo North Garo Hills a·jani Deputy Commissioner-naba u·iataha aro iani bidingo ua sandirokna gita ge·etaniko on·ataha ine u·iataha.