SHILLONG: A·doko skanggipa changna ‘Meghalinor’ Sailing Yacht-ko Budbar salo, a·dokni Tourism Minister Paul Lyngdoh, Tourism-ni Commissioner & Secretary Vijay Kumar D aro Tourism-ni Director C.V Diengdoh-ni dongpaanio, a·dokni Chief Minister Conrad K Sangma, Umiam Lake-o a·bachengate on·anga.
Ia yacht ba chongipa jahasko a·bachengate on·anganio, a·dokni Chief Minister aganprakengon, ia ‘Meghalinor’ yacht-ko a·bachengatani miksonganiara namen ning·tua maina iako ra·baaniara Sports aro Tourism-naba apsan namgniko ra·bana man·gipa ong·gen ine parakataha.
Tourism aro Sports-ko tang·doatani ian sorkario miksongani gnang, mikkangchi a·dokni chadamberangna janggi tangani cholko on·na man·a gita iandakgipa cholrangko ra·bana miksonganian sorkarini dal·a niksamsoani ong·a ineba Sangma aganaha.
“Da·alo Meghalaya a·doko mande jelbra jelsuaoni 50 percent-de bilsi 20-na komigiparangan ong·enga. Ia chadamberangni nanganiko on·a sorkari chanchisoani donga. Uamangna an·tangtango pangchake janggi tangna cholko on·a sorkari niksamsoani gnang. Umiam Lake-an chu·ongaignok indake ong·ja dingtang dingtang water sports-rangko aro indakgipa cholrangko namdapna nangani bang·kuaenga aro iana bate nambatakoba dakna miksongani donga. An·chingni a·dokko a·songo ge·sa nambatsranggipa resort dakna niksamsoani gnang. Da·alo ian chonbegipa a·bachenganisan ong·kuenga maina tourist-rangko bang·batatnade namdapatna nangani bang·kuenga,” ine Sangma aganangaha.
Umiam Lake-an a·doko water sports-ni centre ong·gen ineba ua agandapaha.
