SHILLONG: Ong·telaigipa a·selrang, jekai mikka balwa rakani, banggriani, chi banani aro uandakgipa a·sel ong·anirango jakkalna gita a·dok sorkari, gong kror 19 tangkarangko dingtang dingtang a·jani deputy commissioner (DC)-rangna chame on·ataha.
Meghalaya a·doko re·anggipa May 29 tarikonin mikkarang jimbee waanganichi chi banne aro a·arang be·e, komibeoba sakdok manderang sina nangaha aro saksakode man·pilkujaengachim ine nikna man·a.
Indake ong·engon, ia tangka paisarangko deputy commissioner-rang, a·jatangtango nangani kri koros ka·na man·gen ine a·dokni Revenue & Disaster Management Minister Kyrmen Shylla parakataha.
Batanggimin sal somoirango iandake a·sel ong·anirango sianggipa mande sakprakni nokdangrangnaba a·dok sorkari, gong lak 4 ka·e ex-gratia-ko chamataha. A·sel ong·anio sianggipa dokgipa mandenade ia tangka paisarangko, Block Development Officer (BDO)-ni jako on·ataha.
Batanggimin antionin a·dokni pilak biaprangon dontonggija mikkarang waangahani a·sel chi bananirangko aro a·a be·anirangko bang·en nikna man·aha aro bang·a biaprangon manderang, an·tangtangni nok-jamrangko aro gama ge·anirangkoba gimaatna nangtokahachim. Mikkarang jimbee waanganichi a·dokni bang·a rama jal·langrangba nosto ka·ako man·angtokaha.
