SHILLONG: Ganol Hydro Power Project-ni bangki dongkuenggipa grorangko chotna gita Budbar salo, a·dokni Cabinet, gong kror 30 tangkarangko chamdapna gita tik ka·angaha.
Ganol Hydro Power Project-ni skanggipa bako dongkuenggipa grorangko chotna gita gong kror 30 tangkarangko chamdapna Budbar salo Cabinet-ni tom·anio ra·chakangaha.
Cabinet tom·ani ja·man kobor ra·timgipa manderang baksa agangrikengon, Ganol Hydro Power Project-ni kamrangko matchotahani gimin dingtang dingtang company-rangna nangkuenggipa grorang batroroangjana gita Meghalaya Energy Corporation Limited (MeECL), gong kror 30 tangkarangna proposal-ko ra·baaha aro ia proposal-ko Budbar salo Cabinet ra·chakangaha ine a·dokni Chief Minister Conrad K Sangma parakataha.
“Ia project-ni grorang, mikkangchi batroroangjana gita, dingtang dingtang contractor-rangna bangki dongkuenggipa grorangko chotna sorkari, gong kror 30 tangkarangko chamdapna tik ka·angaha. Ia project-ni chu·gimik koros da·o gong kror 590.88 gapaha,” ine Sangma aganaha.
Cabinet-ni tom·anio, Meghalaya State Energy Conservation Fund Rules (MSECFR) 2025-koba ra·chakangaha ine Chief Minister parakataha.
Ia fund-ko a·dok ge·antinan nangchongmota ine janapatengon, ia MSECFR-ni ning·o bijoli ripingani aro namdapatani dingtang dingtang kamrangko ka·anggen ineba Chief Minister parakataha.
